India sorkari NE nung nüjiso atema raraba miimbanga ayur

Dimapur, May 10 (TYO): India kübok Northeast tesem nung nüjiso bushiba maparen ya India sorkari ‘law & order’ tebilemtsü ka ama sayur aser alima dang iba tesem nung rara mali ta ashir, ta Centre for Refugee Law Studies and Research (Guwahati University) Director, Prof Subhram Rajkhowa-i tanü ashi.
Alima nem memetetdaktsütsü aser meimchir temeden atema inyakba teloktem dang miimbanga ayutsü atema India sorkari yamaji ashir, ta paisa ashi.
Bodbarnü Hotel Acacia, Dimapur nung shisatokden ka nung Prof Subhram-i meimchir temeden atema jembidang, “India-i northeast nung nüjiso atema raraba ya ‘law & order’ tebilemtsü ta ashiba ajanga International Committee of the Red Cross (ICRC) arutsü nokdanger. Anungji, asenoki nübortem dang meimchir temeden atema osang tejangja metetdaktsütsüla” ta ashi.
“Kodang ‘law & order’ tebilemtsü ta südir, iba jagi alima nüjiso atema raraji alima tsüngdang miimbanga ayur. Alimai kodang nüjiso atema rarar ta agizükdir, parnoki iba tebilemtsü aliba linük dang parnoki agia aliba litsü meyipa agüjang ta tetuyuba agütsür. India sorkari alima tsüngdang northeast nung nüjiso atema raraba inyakyim ajembanga ayur” ta Prof Subhram-isa ashi.
Northeast nung nüjiso atema inyakba teloktem jungjunga tenteta lir aser parnoki meshiba litsüjia shitak lateta lir, anungji nüjiso meshitsü atema temsüa lir, ta paisa shisem.
Shisatokden nung Kohima Science College Principal, Dr. Anungla Aier-ia tetsür akhümtsübutsü dak sendakba onük jembidang, “sobaliba temzüng-ozüngtem ajanga tetsürtem tashi maiter. Tesüiba mapangtem nungbo sobaliba temzüng-ozüngtemji tapet liasü saka tanü putu nungbo, aika meputep kümogo, anungji temelenshi kar nüngdaker” ta ashi.
“Naga nunger, teburi senmanga aruba lokti aser tanü alima ainba na tsüngda nokdaka lir. Naga loktiliba nung Naga tsürtem ola mangashir aser nembangtsür aser ajaklen teburtemi amokbanga aliba ajanga tetsürtemi shilem magiteter,” ta laisa ashi.
Naga nungeri tetsürtem akhümtsübur ta asübaji kalenbo shitak, saka chichiba senso ka ama telemtetba agiba inyakyim nungbo tetsürtem temeden mali aser tetsürtemi tetsükdaktsü aika ajurur, ta Dr. Anungla-isa shisem.
Naga nungertemi meimchir temetentem alema inyaker aser tanü asenoki tetsür-tebur kasa jenjang kati bener marura, tarutsü pututemi tetsükdaktsü jenti ajurutsü, ta laisa metetdaktsü.
Prodigals’ Home Director, K Ela-i tanur temeten indang jembidang, Nagaland nung aser talisa Dimapur nung tanur temeten alema mapa inyaker aser anogoshia tanurtem madak tashiyim amshir, ta ashi.
“Taintemi tanurtem anepalutsüla aser kümzüka ayutsüla sürnung aiben taintemi ang tanurtem dak tashiyim mapa inyaker. Tetsür tanurtem dak tim mesüi kongshiba, tashiyim agi shi nung medemba aser tanga onük aika asen loktiliba nung ataloker saka tenüng menüktsü tsübuba ajanga item tatalokbatem miimbanger,” ta Ela-isa metetdaktsü.
Kidang kilir inyaktsü atema tanurtem ayuba aija Ela-isa, “iba ya meimchir temeden anema inyakba mapa ka lir. Parnok nem kaket shisatsü agütsütsü tenüng nung kilitsü ayubaji meimchir temeden anema aser nisung shibelenba inyakyim den kasa lir” ta ashi.
Tanü sentong nung MLA Dr. Longri-i Naga Peoples Movement for Human Rights (NPMHR) indang otsü aser pai iba nung inyaka aruba indang osang metetdaktsü.
Iba shisatokden sentong ya Naga Peoples Movement for Human Rights (NPMHR)-i ayongzüka agi.