CHSS nungi Toppers nem tenüngsang agütsü

Dimapur, May 11 (TYO): Brihostibarnü Christian Higher Secondary School, Dimapur-i par school nungi HSLC aser HSSLC 2017 nung toppers nem tenüngsang agütsüba sentong ka agia liasü, aser iba sentong nung toppers den parnok kinüngertem aden.
Iba sentong nung CHSS Principal, S. Moatemsu Walling-i NBCC General Secretary aser School Managing Board-i takok angur kaketshirtem nem tenüngsang agütsüba osang zünga metetdakja liasü.
Paisa toppers dang maneni parnoki mapa tajung inyaktsü ayongzükba den külemi parnoki tatishitsü tajung yutsübaji kodanga mamatoktsü, ta metetdaktsü.
Paisa tsürabur aser tesayurtem danga longjemer inyakba aser parnoki shilem tajung agiba ajanga kaketshirtemi takok ngutetba atema tenüngsang agütsü.
Ano toppers aser parnok tsüraburtemia pelaba olen lemsatepba den külemi ‘junior’ tem dang meranga azüngtsü ajungshi.
Iba sentong ya Vice Principal, Patricia Zhimomi leniba nung agi aser CHHS Chaplain, Vezachilü Sakhrie-i Tsüngrem dang nungi temoatsü meshizüka liasü.