Mkg nung Micro, Small & Medium Enterprises sentong ka agi

May 11, 2017 nü Mokokchung nung RBI-i ayongba MSME shisatokden sentong nung Mokokchung D.C Sushil Kumar Patel IAS-i jembidang tangokba noksa nung angur. 

Mokokchung, May 11 (TYO): Reserve Bank of India (RBI) Guwahati-i Brihostibarnü Longkumer Kilem Mokokchung nung sen apotsüba “Micro, Small & Medium Enterprises (MSME)” dak sendakba nung shisatokden sentong tajung ka ayongzüka agiogo.
Iba sentong nung Mokokchung nung aliba bank balala nung inyakertem den telok balala nungi tanishirtem aser business inyakertem aika adenshia shilem agia liasü.
Tanü iba sentong nung tongti tesemdanger Mokokchung Deputy Commissioner, Sushil Kumar Patel IAS-i jembidang, banking inyakyim junga alinung dang lokti kaji tejakleni aor saka aiben Mokokchung nung bank inyakyim jangramatem ajangshia arudar, ta temulung masüba olen ka ashi.
Bank nung inyakyim onsara lir, ibayongji aiben tim tangutsü nisungtem kecha mangur, anungji, bank inyakyimji tongmelang asütsü nüngdaker, ta paisa tebilem ka lemsatep.
Nagaland nung industry tulu mali, yangi rongsenkettsüng rangben itasen dak dang nendaka lir. Aji oda, business inyaktsü asoshi sen terara indoktsüsa akümer. Anungji, bank-i “business shitak inyakertemji metettsüla aser parnok nemji teyari lenmang lapoktsütsüla,” ta paisa ashi.
“Nüngdak makaba nung bank nungi sen apobaji majung, anungji, tongtibang nüngdak melira sen mashi-mashi mapotsüla”, ta paisa ashi.
“Business inyaker aikati tajangzük tulu dang bushir aser tajangzükji yakta nguner,” ta pai melenshidaktsünüba yimya ka tuteta ashi. Aji oda, bank-i temulung lemtettsüsa ochishia aser mapa meranga inyaktsü asoshi paisa ayongzüka liasü.
Nüburtemi bank indang tali metettsü aser bank inyakyim tajungba aotsü asoshi iba ama sentong ya mapang shia ayongzüka akatsüla, ta paisa shisem.
Sentong nung shisalen sayurtemji; Aridaman Kumar (DGM, RBI), Bhagyalatha Kaushik (AGM, RBI), T.Lipoktoshi Ao (GM, DICC), Tali Longchar (Dy. Director MSME-DI Dimapur), S.P Gante (Manager, SIDBI), S.K Das (AGM, Canara Bank), Amar Jeet (DDM, NABARD), M.M Pathak (Manager, RBI), N.K Goswami (Manager, RBI), Pradeep Saxena (Manager, RBI) nungertemi mapang tatsütsü agia jembi.
Kasa sentong nung Mokokchung Chamber of Commerce & Industries tir aser MEC mendenbuba Tsükti Lkr-ia liso nisungtemi ajuruba tebilemtsü kar lemsatepa liasü.