NVCO-i CM dang Lokayukta ayutsü takangba agütsü

Kohima, May 11 (TYO) : Nagaland Voluntary Consumers’ Organisation (NVCO)-i Nagaland nung ochimashi mapatem kanga inyaker asünungji, itemji nokdangtsü atema tekaratiba nung Lokayukta ayutsüla ta tanü Brehostibar nü takangba ka agütsüogo.
Tang Nagaland nung nübortem anepalutsü atema shimtettertemiang ochimashi mapa tuluba inyaka nübortem timtemdaktsür, anungji tang Nagaland atema nüngdakbaji Lokayukta nüngdaker ta NVCO tir Wb. Kezhokhoto Savi-i metetdaktsü.
” Ochimashi mapa inyakba ya cancer tashidak amai dang lir, mapang shitak nung meputetra tuluba-tuluba küma aor aser iba jagi linük nung timtem lendong tulu bener arutsür,” ta Supreme Court-i shia lir ta NVCO tirisa metetdaktsü.
Yimten tashi nung alidang, iba yimten tashiji amshia tangar timtemdakja tajangzük bushir aser ano government mapa nung tulur karibo 4th grade mapa nung kar anioktsü aser parnokji pei kibong mapa nung amshir, item grade 4th mesüra constable-temji tulurtemi kar pei tsürabur anepaludaktsür, kar aremi süng abeni yoker aser karbo shirururang anepaludaktsür. Ano, tulurtem karibo election nung senotsü agi candidate yarir aser parnokiang voter-tem mesüzüka jajar ta NVCO-isa Nagaland nung ochimashi mapatem inyakba mapatem kar tuteta metetdaktsü.
Ano, Nagaland nungbo tazünger aser lanurtem rongnung toktepa tajung purtem shimtettsü asoshi mapa tazüng aliba metetdakja advertisement magütsür saka yimten yimsüsür aser tulurtemi pei adianu aser kinungertem dang shimer. Ano, mapa tazüng adoka maliyonga shimer aser ano karbo mapa ana asem nung inyaka ita sen achir aser karbo nisung tiyazü tenüng nung ita sen yanglua achir ta NVCO-isa metetdaktsü.
Ano, contract aser supply mapa inyaktsü asoshi kodanga yimjak nung mesangdonger saka miima table nung dang inyakteper aser ano aluyimer, yimtaklirtem aser sensakertem asoshi teyari lemzüktsübatem government nung tashi alirtemi agiadoker ta parnokisa metetdaktsü.
Itemji dang masü saka mapa shia yimsüsür, tulurtem aser telong nung alirtemi shilem ka (commission) agiteta ayur aser ano government tenzükertem ita sen nungia sarutepa agütsür. Ano, Nagaland police-temi anükba check gate-tem nunga sen meshir aser Municipal aser town council purtemia nübortemi agütsüba tax agi terenlok mapa meinyaker. Item ajakji Nagaland nung ochimashi inyakba mapatem lir ta NVCO telokisa metetdaktsü.
Ano, Nagaland nung government mapa sen agi ayoker aser sübokrem mamshira mapa kecha meinyaktetter aser government sen Civil deposit nung yur mashi amshir. Iba jagi küm shia CAG-i audit agiba osang nung Nagaland nung ketdangsertemi senotsü mashi amshiba osang agi sünga alir ta NVCO-isa metetdaktsüogo.
Iba ama ochimashi mapatem kanga sashia inyaker asünungji, itemji anendaktsütsü atema yaktasa Nagaland nung Lokayukta ayutsüla ta NVCO-isa state government nem takangba ka nenshia metetdaktsüogo.
Lokayukta yagibo ochimashi inyakertem anema ken o kar dang lira tulur tilar kecha mali, ajak kasasa jenjang ka nung, Chief Minister, Cabinet Ministers, the M.L.A, Vice-Chancellor of Universities, Bureaucrats, Secretaries aser tulurtem daka tapet mapa inyaktsü koka lir.