Airtel, Micromax külemi Canvas 2 nung 4G küm ka asoshi angati agütsür

May 12, 2017 (Agencies): Tanü Micromax ajanga sayaba Canvas 2 smartphone nung Bharti Airtel ajanga küm ka asoshi 4G data aser A2A call angati agütsütsü.
“Micromax Canvas 2 nung Airtel nungi Airtel dangi angati tanen maka jembitsü aser data tanen makai amshiba nung taa magitsü aser iba maongka ya Airtel network indang costumer tasen aser tejenpur ajak nem agütsütsü,” ta Micromax indang Chief Marketing Officer, Shubhajit Sen-i osangbener dang ashi.
Tanü Micromax indang dual SIM 4G VoLTE aketba Canvas 2 smartphone sayaogo. Iba phone jenjang ya sen 11,999 lir.
Iba smartphone amshirtem nem Airtel ajanga anogoshia 1GB 4G data agütsütsü aser meilongi iba speed tajemba akümtsü, ta Sen-i ashi.
Canvas 2 smartphone alir nem India nung network mashi den küm ka jembitsü asoshi anogoshia minute 400 melatsü aser hopta shia minute 1,500 jembitettsü.
“Reliance Jio ajanga ita asem angati jembitsü sayadang iba store kima nisung mesemi nokdaka angu. Küm ka asoshi onoki iba maongka agütsüba nung koma asütsüar memetet. Iba sülen ita asem indang offer ya akhi ama kümogo saka küm ka asoshi maongka agütsüba anu shinga-ia mangu,” ta Micromax Informatics co-founder, Rahul Sharma-i ashi.
Retail store tem nung ayoktsü asoshi tanü nungi Canvas 2 bener aru tenzükogo.
“Taruba hopta tatemlen iba phone ya linük nung shishilembadak shilem 40-60 nung angutsü. Corning Gorilla Glass 5 keter aliba phone India nung ibai mezüngbuba lir. Diwali mapang tashi nung Canvas 2 ya tajemba agi million 1 India-i bener marura onok mepelatsü,” ta Sen-isa ashi.
Micromax Canvas 2 ya offline retail channel ajanga dang ayoktsü.
Iba phone nung Android Nougat lir aser MediaTek quad core chipset keta lir. Canvas 2 indang battery ya 3,050 mAh lir aser ghonda 11 tashi jembitsü akoktsü. Iba smartphone nung 3GB RAM, internal storage 16GB aser memory card ajanga 64GB tashi inoka amshitettsü.
“Offline ajanga alirtemi maongka tali akinür, anungji onoki iba phone offline nung dang ayoktsü. Iba phone indang screen melentsü asoshi maongka küm ka agütsütsü aser iba phone melentsü anogo 30 agütsütsü,” ta Sen-isa ashi.
Nüburtemi smartphone jenjang sen 10,000-15,000 tsüngta aliba nung rangloker Micromax-i küm ka tsüngta nung smartphone 15 sayatsü sentong lir, ta Sharma-i ashi.