Justin Bieber-i Mumbai concert nung pa sapurtem ashiokja ken aten

Mumbai, May 12 (Agencies): May 10 aonung Mumbai nung Canada nunger nüngtugu kentener, Justin Bieber kenten sentong ajanga aika peladaktsüogo, ajisüaka ano nisung aikati, pai yazü nung dang tebangmechi aküpshia ken aten (lip-syncing), ta aitsür.
Mumbai kenten sentong nung India nunger linük tesem balala nungi nisung 45,000 shi adenshia liasü, saka anibelem, tatsük den sen aika indoka ticket aliaka pai ken karbo shidakba nung meteni tebangmechi dang aküpshi, ta shia aika tezüdangteper.
Osang angazükba agi, iba aonungji pai ken 12 shibo maten saka tebangmechi dang aküpshi.
Iba concert nung US sen million 4 shi indok; International jenjang nung kentener ka ama pai kenten sentong tayongertem dang takhangba akia liasü, iba den külemi pa sapurtem ticket nung sen 5,000 nungi sen 15,000 tashi indokogo.
Iba dak sendakba nung kentener, Leon Saalis de Souza-i, “Justin Bieber, yimlibilema India nung kenten sentong tagi. Fireworks dak alaka iba sentong ya majung liasü. Iba ama sentong ka atema onoki ita pezü ataa liasü,” ta ashi.
Ano kentener, Sona Mohapatra-ia, “Tembaba jenjang amadokang, onok sen agir onok mezüngmeshi tesü,”ta ashi.
Ano taküm February ita nungi pa kenten sentong yongyaa atar nisung ka tenüng agi, Amit Sarkar-i, “Pai [Justin] pa indang CD nungi atener amai liasü. Pai yamai inyaktsü ta ni mebilem. Item kenji pai atener masü ta tejangja,” ta ashi.
Ano tetsür ka tenüng agi Tina Joshi-i, “Kanga lemyiba agi asütsüa akok. Pai yamai shilem agiba ngua mepelar. Pai jungdak (live) atentsü ta bilem, saka kü indang ‘play list’ nung aliba pa kentem angar ama dang liasü,” ta ashi.