North Korea-i US House of Representatives dangi shidi ka zülu

Seoul, May 12 (Agencies): North Korea-i Hokolbarnü US House of Representatives dangi shidi ka züluba nung, US-i par linük anema tenokdangba tali agütsüra, parnoki nuclear weapons talila yanglutsü ta shia lir.
North Korea nung Supreme People’s Assembly indang Foreign Affairs Committee-i shidiji zülu.
“U.S. House of Representatives-i anaben bilemdanger ang ozü linük anema tenokdangbatem agütsütsüla. Aji mesüra, lendong tulu ajurutsü” ta shidi nung shia lir.
North Korea nung nuclear & missile development maparen atema mepetmesü adoker joko hopta ishika süia arur aser parnoki U.N. Security Council telemtetba anema trokbuba nuclear test mesüra ballistic missile tanga ka tendangtsü akok ta arentaka bilemer.
Tan ita tetenzüklen House of Representatives-i North Korea indang shipping industry aser company tem tali alenbangtsü atema telemtetba ka agiogo.
North Korea indang nuclear programme asoshi senotsü bendenba azüoktsü aser memchir temeden anema alar tia nung nisungtem mapa inyakdaktsüba anendaktsütsü atema US-i iba telemtetba agi.
“US House of Representatives-i ozüng tesashi teimba yangluba ajanga, Democratic People’s Republic of Korea (DPRK)-i nuclear maparen tali akangshitsü” ta committee-i US dangi züluba shidi nungsa shia lir.
Foreign Affairs Committee ya 1990s mapang agiena liasü saka taoba ita North Korea-i iba luden tanaben asentenshia tentet. Parnoki alima den tesentaktep tajungba küma yanglutsü nükjidong iba luden tentetshir asütsü akok ta asameyangertemi ashir.
Iba luden nung mendenbubaji North Korea lennir Kim Jong Un den yariteper tajunga ka, Ri Su Yong lir.