UP sorkari anogo 40 tsüngda gari lenmang nung ongken yanglumatsü

New Delhi, May 12 (Agencies): Uttar Pradesh sorkari anogo 40 nü tsüngda nungsa gari lenmang 11,107 nung ongken aliba ajak yanglumatsü atema atemzükogo, aser iba atemaji Chief Minister, Yogi Adityanath-i aniba sorkari sen crore 1,400 lemzüktsüogo.
State sorkari May 6 nü iba mapa atema senji lemzükja liasü, aser mapaji tzünglu aru metenzükdang June 15 tashi nungbosa tembanga inyaktsü atemzükogo.
Lucknow yimti aser iba kübok aliba district tem nung gari lenmang 1,632 tashi nung ongken aika lir. Iba sülen Faizabad, Allahabad, Azamgarh, Agra aser Gorakhpur kübok tesemtem nunga gari lenmang aika nung ongken lir.
UP Public Works Department-i ita ka shia mapang agia item lenmang asadanga liasü, aser gari lenmang kilometer 85,943 nung ongken aliba bushitet.
Iba dak sendakba nung Chief Minister-i lenmang yangluba oset tajung dang amshitsü aser lokti lenirtemi tenük kuli lia gari lenmang yanglubaji video tangoktsü tetuyuba agütsüogo.
Iba dak alia CM den tanga minister temia mapangshia ajungbena gari lenmang yanglubaji mita semdangtsü.