Railway High School küm 65 ajungba benjung amung

Dimapur, May 12, 2017: Hokolbarnü Railway High School, Dimapur küm 65 ajungba benjungmung sentong nung School Education & SCERT Minister, Yitachu aser Hojai, Assam, MLA Shiladtiya Dev nati souvenir sayatsüba noksa nung angur. Kasa noksa nung tongtibang nisungtema kar angur.

Dimapur, May 12 (TYO): Dimapur nung school tejentem rongnung ka, Railway High School, Dimapur Hokolbarnü küm 65 ajungba benjungmung mungogo, aser iba sentong nung tongti tesemdangerji School Education & SCERT Minister, Yitachu aser tetushi tejaokerji, Hojai, Assam, MLA Shiladtiya Dev liasü.
Iba school ya Railway epartment-i ketdangser.
Iba school nung kaketshir 1,000 dak tema tenüng züluoka tenzüka liasü, aser school nungi tongtibang nisung aika adokogo. Ajisüaka tim ketdangsertemi sendoka yutsüba ajanga tanübo school nung kaketshirtem kanga ajema kümogo.
Iba school timtem angateta minister-i, iba school ketdangsübaren angazüka mepelar, iba school ajungkettsü atema management aser tim ketdangser tsüngda amalitepa inyaktsüla, ta metetdaktsü.
Paisa, iba onükji pai temeba ketdangsertem dena jembitsü; ibaji ajanga telok (tamangba telok) ka nungi dang masü saka tanga teloktem nungia kaketshirtema atsüer arutettsü, ta metetdaktsü.
Paisa tesayurtem dang nendaka inyaktsü aser lenla ajak nung lkti terenlok nung shilem agitsü ajungshi.
Iba school ya akhidang ama tanaben asentenshitsü imlar, ta paisa shisem.
MLA, Dev-ia tang iba jenjang tashi school anir arutetba atema iba school mezüng tenzükertem nem tenüngsang agütsüba den külemi tesayurtem danga pelaba lemsatep.
Paisa iba school terenlok atema temaba ketdangsrtem den jembitsü, ta metetdaktsü.
Ano Muslim Council Dimapur-i sensaker kaketshirtem atema schools uniform 10 tenla agüja liasü.