Mokokchung nung GST indang tesayuba agütsü

Mokokchung, May 12 (TYO): Central Excise & Services Tax Govt. of India den külem sür Department of Taxes Govt. of Nagaland-i Goods and Services Tax (GST) indang meteta alitsü asoshi tesayuba sentong tajung ka yangi Mokokchung town hall nung ayongzüka liogo. Iba sentong nung Mokokchung nung aliba dealers-tem aika arua shilem agia liasü.
India linük ajunga nung GST ya July 1, 2017 nungi mapa küma aotsü, iba ya kodang mapa kümdir lenla aika nung nüburtem tajangzük angutsü imlar, ta Mokokchung Deputy Commissioner, Sushil Kumar Patel IAS-i iba shisatokden lapokja jembidang ashi.
Linük nung saru (Tax) aika aliba nungi ka dang akümtsü alinung, osettsüset ajak nung jenjang tajemba akümtsü, anungji, tang dang nungi tajangzük teimba angutsü aser iba ya ajanga tax agütsüba inyakyim nunga khuret tepongba akümtsü imlar, ta paisa ashi.
State asoshia iba inyakyim tasen ajanga rongsen arulen lenmang tajung ka asütsü aser state asoshi terenlok mapa inyakba nung iba ajanga tajangzük tulu agütsütsü aser rongsenren nunga terenlok angutsü, ta paisa shisem.
Temelenshi ya mepaitoktetba maparen ka lir aser yimya agi inyakyim tasen ka arudangji timtem terabo ajurutsü, aji saka, item timtem koktettsü asoshi state sorkari akokba tashi nüngdakba teyari lenmang sayutsü asoshi renema lir, ta paisa ashi.
Iba mapa takok angutsü asoshi Internet service junga alitsüla, joko kopi melii central sorkari North-East atema 100 Mbps satellite link ka amenoktsü asoshi inyakdaki, anungji, kodang ibaji arudir kinük pezüsü nung internet service atema tebilemtsü malitsü, ta paisa ashi.
State sorkari office ajak nung Tax Services Centres amenokogo, item centre-temji tax agütsüba maparen nung angati amshitettsü, ta paisa shisem.
Tang India nung tax aika lir, tatishitsü agi VAT, service tax, excise duty, entry tax, purchase tax, lucury tax ym. saka kodang GST ya mapa kümdir, linük ajunga nung goods and services tax agütsüba inyakyimji ka dang akümtsü. Iba ya kodang mapa kümdir yangi tajangzük aika dang sentaka lir aser iba ya India nung otsüsütsü ka asütsü, anungji, iba inyakyim tasenba ya Nagaland nunga takok angutsü ajaki merangtsüla, ta shisalen sayur kati ayongzüka ashi.
Sentong nung shisalen sayur; Sanjeet Kumar IRS (Asst. Commissioner, Central Excise & Service Tax Shillong), Zulutemsü Lkr (Superintendent of Taxes), Chubanaro (Superintendent of Taxes) par asemi GST dak sentakba onük balala nung power point presentation agütsü.