Manipur nung lawyer amokmerenba atema bushisüngdanger

Imphal, May 12 (Agencies): Manipur nung Supreme Court lawyer ka amokmerener ta ken o benokba sülen Manipur Police-i bushisüngdang tenzükogo.
“Nüngdak dang süra, iba ken o ya National Investigating Agency (NIA) ket nung agütsütsü,” ta Principal Secretary (Home) J Suresh Babu-i metetdaktsü.
March 20, 2011 nü Irom Roger-i N Ajay Meetei nem gari aotsü lenmang magütsüba atema tejashi nung Ajay-i Irom khaset. Iba ken o atema Irom’er kibongi lawyer Utsav Singh Bains dang nungi teyari meshia okadak ken o benok.
Ajay Meetei ya Manipur nung tang chief minister teinyakdak Biren Singh’er jabaso lir aser pa taküm January ita okadaki aija tepuokdak küm pungu ayutsü temerenshi agütsü aser tang pa tepuokdak yua lir.
Taküm March 17 nungi 19 tashi Bains-i iba ken o atema Imphal semdang aser pa meyipa aoba sülen March 22 nü WhatsApp ajanga nisung kati pa dang iba ken o atema meinyaktsü amokmeren ta Bains-i SP (CID) Imphal police tsüngdang ken o benok.
Nisungbaji PLA (People’s Liberation Army) aser NSCN-IM nungi ta shia pa amokmeren, ta Bains-i ashi.
Iba dak sendakba nung sub-divisional police officer kati bushisüngdang tenzükogo aser Bains-i state semdangi arudang security agütsütsü, ta principal secretary Khaute-i yashi osangbener dang ashi.
Bains dangi phone asüba number ji Myanmar nungi liasü ta bushitetogo aser kobi melii osang tejangja metettsü, ta Khaute-isa shisem.
“Onoki iba ken o süoki agir aser akokba tashi bushisüngdangtsü. Nüngdak dang süra, iba ken o ya NIA nem agütsütsü” ta DGP-ia metetdaktsü.