Italy ozüng amshirtemi WhatsApp dang senchi sen mn $3 achi

London, May 13 (Agencies): WhatsApp amshirtem dang parnok nija data kangshia Facebook den lemsateptsüba sülen WhatsApp dang senchi sen million $3.3 achi.
‘European Union data protection authorities’ 28pronglai iba ‘chat app’ dang nüburtem indang data Facebook den melemsateptsü asoshi metetdaktsü, ta osang ajanga metetdaktsü.
Facebook-i 2014 küm August ita WhatsApp alizük aser iba sülen parnoki nüburtem indang nija data tem asadangtsü asoshi Facebook nem agütsütsü atema ‘privacy policy’ melenshi. Iba ajanga India nunga mangatettep adoka liasü.
April ita India sorkari Supreme Court dang data kümzüka ayutsüba aser nija data tem ‘networking sites’ aser ‘online messaging service’ tem nung lemsatepba aputsü asoshi ozüng ka yanglutsü atema asadangdar ta metetdaktsü.
2016 September 23 nü Delhi High Court-i WhatsApp privacy policy tasenba mapa küma inyaka aotsü asoshi temelaba agütsüba sülen ‘petitioner’-i iba court challenge asü.
Aji saka high court-i WhatsApp amshirtem data 2016 September 25 nü tashi nung bendena alibatembo Facebook mesüra iba dak sendakba company kecha dena melamsatettsü ta lemtettsü.
Facebook-i WhatsApp alizükba mapang iba app amshirtem indang nija osang balala kümzüka ayutsübaji parnok indang DNA nung keta lir ta metetdakja liasü.
Aji saka Italy indang ‘anti-trust regulator’-i ashiba agi, “WhatsApp amshirtem asoshi parnok nija data lemsateptsü asoshi memolungra melemsateptsü asoshi maongka lir saka shidakba inyakyim nungbo tera timtim lir.”
‘Data protection laws’ dak alia inyakba sülen April ita Germany nunger ketdangsertemi linük nung WhatsApp tem ket nung Facebook-i osang kecha mebendentsü asoshi nokdang.
Facebook-i WhatsApp alizükba sülen nungi nija data kümzüka ayutsüba dak sendakba nung timtem aika adoka arudar.
2017 küm tetenzüklen osang ka ajanga Facebook aser tangari ‘encrypted’ osang tem züngtettsüba WhatsApp messaging service nung keta aliba metetdaktsü, saka iba osang WhatsApp-i aija liasü.