Haryana nung tetsür ka tashiyim agi shi nung medemer tepset

Sonipat, May 13 (Agencies): Haryana kübok Sonepat tesem nung arishi küm 23 tain tetsür ka tebur telok kati tashiyim agi shi nung medemba sülen tepset.
Taoba Mongulbarnü tetsürlaji lar kidang nungi pur Rohtak district-i anir ao, ta police-i ashi.
Idakji la apurtemi la dak tashiyim agi shi nung medem aser iba sülen lungro kati la tekolak aiben ako, ta police ketdangser Ajay Malik-i ashi.
Tetsürla tepseter ta tai tonglokja alir nisung ana- Sumit aser Vikas na puogo aser Sumit yabo tetsürla den metettepa liasü, ta police ketdangserisa shisem.
Tetsürla indang mangji Brihostibarnü Rohtak nung süisübongertemi mezüng angu. Yimtong azütemi la indang tejak aser tetsünglenbo chir lia mangji angu.
Hopta ka tejaklen tebur kati tetsürla aniasünga liasü saka lai ibaji magizük. May 9 nü iba tebursang jagi par medemer kar anir lar kidangi aru.
Tetsürlar kibongi ashiba agi teburtem jagi la Sonepat nung apu aser Rohtak-i anir ao. Parnoki la samaba ken o ji Sonepat police station nung benoka liasü.
Lar tsüraburtemi la tashiyim agi raksatsür tepsetertemji süngzü agi alensettsüla ta takhangba agütsür.
Tang tashi police mesüra sorkar nungi nisung shingaia lar kibong den arua majurutep ta parnoki aitsür.
Iba osang angashia kanga aoksar aser jashir ta Congress president, Sonia Gandhi-i osang metetdaktsüogo.
“Iba ama taochi maliba inyakyim ajanga linük nung nisungtem aoksadaktsür. Iba ajanga asenoki tetsürtem kümzüka ayutsü atema mapa inyakba meyipa reprangshitsüla ta sayur” ta Sonia-i ashi.
Haryana sorkari tai tonglokja alirtem merenshitsü aser takoksa ajurur kibong den yariteptsü imlar, ta laisa shisem.