N.I Jamir GHHS kümshi result tajungba renloker

Mokokchung, May 13 (TYO): Yimyu nung aliba N.I Jamir Govt. Hr. Sec. School Ongpangkong nung Class 10 aser 12 takoker kaketshir nem tetushi agütsüba sentong ka par school kilem nung meraketa agiogo.
Taküm iba school nungi class 10 nung kaketshir 12 aser class 12 nung 13 agütsüba parnok ajaki takok nguogo. Takoker rongnung class 10 nung kaketshir asem aser class 12 nung nisung anati subject balala nung distinction ngua liasü. Class 10 nung kati subject asem nung aser class 12 nungia kati subject asem nung distinction ngua takok tajung ngua school nem tenüng tajung bener arutsüogo.
Tanü iba sentong nung Ongpangkong Mungdang tir aser tang Ao Senden tir bena alisang, Wb. C. Angang Jamiri jembidang, iba school ya tesüiba mapangbo tepetzük tia ka nung liasü, saka tanübo timtem jenti ajanger külen takok tajung anguba asoshi tongtibangsa school ketdangsüri anir tesayurtem aser kaketshir ajak dang pelaba mezüngbuba lemsatep.
Kaketshirtemi tang takok anguba ya tetenzüker ka südaktsür tarutsü nükla tajung yur pei sempet tajungtiba amshia takoker senso kaka akümtsü asoshi paisa tayongzükba ka agütsü.
“Kaketshirtemi pei nükjidong senzüka yutsür alima tobur ajung mopung nem mekokdaktsütsüla” ta paisa tekümdangtsü o ka ashi.
Sentong nung EAC Livitoli Sukhalu-ia mapang tatsüka agidang, kaketshirtemji high school aser secondary sülen ano college balala azüngtsüba lir, anungji, na kechi azüngtsüla aser na kechi nükjidong lir, iba nungji akangakang amettsüla aser kechi züngdir züngaka, temulungtetba aser bendanga agütsütsüba nüngdaker, ta laisa ashi.
Laisa kaketshirtem dang tazüngba luyim balala nung takok ngur meyipa arua lokti nem tajangzük agütsütsü asoshi nükla yur azüngtsü ayongzüka liasü.
N.I Jamir GHSS otsü nung taküm result ya tajungtiba asütsü, anungji, kaketshir aser tesayurtem den ano iba school asoshi shirnokisa anibülem agia inyaker, parnok ajak dang pelaba, N.I Jamir GHSS principal Temsürenla Longchar-i metetdaktsü.
Class 10 aser 12 nung takok angur ajak nem school-i tetushi sempet kaka agütsü. N.I Jamir GHSS school ya Mokokchung district nung school tejentiba rongnung tanabuba lir. 2016 nungi balaka iba school nung result tajungba kümdagi. Kaketshir takoker ajak tenüng nung Kr. Pongennaro-i mapang tatsüka agia jembi. KBA Associate Pastor Youth & Christian Education Tiawatii kaketshirtem asoshi temoatsü meshia sarasademtsü.