Manipur-Nagaland tesendaktep tajungba akümer

Guwahati, May 13 : Tan Mongolbar nü Nagaland Chief minister, Dr.Shürhozelie Imphal tonga iagi Manipur Chief minister, N.Biren Singh ajuruba sülen state ana tsüngda tesendaktep tajungba küma aoba temaitsü, Tangkhul nunger aliba Ukhrul duistrict nung Shirui yimtak Shirui Lily benjong nung adentsü asoshi Nagaland nungia jaoka lir.
Manipur kübok Ukhrul district nung Shirui yimtak ya Shirui lily naro kanga longsua aponger aser iba tenüng nung May 16 nungi 20 tashi Shirui Lily benjong sentong ka amongtsü renema lir.
Manipur aser Nagaland nung alirtem na pronglai state ana tsüngda kecha mangatettep melii putepa linür. Tan Nagaland CM Imphal nung iagi amongba mapang Manipur Chief minister-i Nagaland nungi kar Shirui Lily benjong nung aruagi adentsü asüngdanga liasü aser ibaji agizüka Nagaland nungi yartsüngsanger telok ka yoktsü renemdagi ta angazüker.
Manipur nung Shirui Lily benjong ya state level nung ayongzüka amongba ya tang mezüngbuba asütsü. Manipur nung Congress teloki taoba küm 15 tashi yimsü asüdang Ukhrul leni Chief minister sadema mouteti aruba sülen tang Manipur nung BJP teloki aniba government arur Chief minister Biren-i Ukhrul tashi kecha timtem melii semdanga liasü.
Nagaland state kümer külen Nagaland chief minister Imphal tashi irr Manipur chief minister ajurutepbaji tang mezüng asütsü. Iba yagi state ana tsüngda tesendaktep tajungba küma yanglutettsü ta Manipur chief minister office nung ketdangser kati metetdaktsü.
Tang Ukhrul district nung Shirui Lily benjong aliba ya Tangkhul nunger sobaliba ajungkettsütsü asoshi dang masü saka Manipur nung aliba kintem rongnung teputep adokdaktsütsü merangba sentong ka asütsü ta Manipur government nung ketdangser kati ashi.