Signal Angami nung Aortemi yim anepalutsü

Dimapur, May 13 (TO) : Dimapur nung Signal Angami yimtak alir Aortemi lenmang sadema lapoktsü asoshi ali agütsütsü aser lenmang mejungi alibatem yanglushia aotsü telemtetba agiogo.
Iba telemtetba ya Honibar nü Angami Signal Aor Telongjem Dimapur lokti senden aliba mapang lemtet. Iba senden nungsa Aotsür Aor electoral roll nung pei tenüng enoka malirtem ajungshitepa enoktsü asoshi telemtetba agia liasü.
Tanü iba sentong nung tajungshi o jembir, Wb.Limameren ( Rtd Director, Soil & WC) aser Ao Senso Telongjem Dimapur (ASTD) tir Wb.Supu Jamir na liasü.
Wb.Limamereni jembidang, Dimapur ya pei lima asünungji, pei lima ta bilema yimten aser lokti nung kibur küma shilem agitsü asoshi ajungshia liasü. Paisa nübortem dang tzü mopong memenendaktsüi apayua aser tajangzük lia amshitsü asoshi tayongzükba agütsü.
Wb.Supu Jamiri jembidang, tanü asen lima nung pei ajungtsü aser pei nüngdak jembir dang saka nübortem nüngdak indangbo mebilemer aser mejembir, ibayongji tatar senden nunga tejembitsü onük maka senshir ta metetdaktsü.
Tanü Naga lima ya Farao chuba pongmang nung kongrasüker tesempatsü nashi teneti nashi tsüla teyira tenet chiaka meyira kasadang kongrasüker angu ama, nübortem meyong center nungi aruba teyaritem chipet chiaka meyirar aser ayawara aru ama sentsüh agi Nagaland tsübangogo ta Supu Jamirisa temulung shirangba o ka lemsatep.
Nagaland tejakleni moutet rajang küma kangshiba ya nükmen nung aia lir aser ibaji yimten mangatet ser yimsüsür akümba ajanga lir. Naga nunger asoshibo shibai kecha meinyaktsü ser inyak ama tiyazü agi shitak küma jembitetter pajiang tetemsü yimsüsür ama bilemer. Iba tai tangatetbaji yutsür tang nungibo yimsüsür mechi nübortem timatemtsüsa masü saka nübortem asoshi timtem agiba nisung aser nübor jenjang angatetba lenir shimtsü merangdi ta ASTD tirisa ayongzük.
Iba lokti senden nung Signal Angami yimtak alir Ao lanurtemi sobaliba ken tajung ka tena liasü.