TDLSA-i legal awareness sentong ayongzüka agi

Dimapur, May 14 (TYO): May 13, 2017 nü C.K.S Hall nung Tuensang District Legal Services Authority (TDLSA)-i Tuensang nung aliba arogotem den anogo ka legal awareness programme ayongzüka agi.
Sentong nung okila jembidang, Judicial Magistrate First Class, Tuensang aser Secretary TDLSA, N. Kano-i District Legal Services Authority ajanga mapa inyakbatem indang osang metetdaktsü.
Paisa, angati legal services angutsüpurtem aser iba iba ajanga teküpoktiba jenjang nung alirtem teyari anguba indang osang lemsatep.
Mangashir aser memeteter nem legal awareness metetdaktsütsü atema arogotemi tongti shilem agitsüla, ta Secretary Kano-isa ayongzük.
APP Tuensang, Heroto Chishi-i ‘Consumer Rights and Motor Vehicle Accident Claims’ indang onük jembidang, consumer kati koma, kodaser aser kong ken o benoktsü aser teyari komala angutsü ta asüba osangtem metetdaktsü.
District shia Consumer Court ji District and Session’s Court lir aser senso ajaki consumer ka ama temetentem meteta alitsü tim, ta paisa ashi.
Heroto Chishi-isa Insurance Company tajung nung Motor Vehicle insure asütsü aser lendong atalokdang, sabang shitak nung ken o benoktsü indang osang tejangja metetdaktsü.
Sentong nungsa Master Trainer NSLSA, Cheliam Khiamniungan-i ‘gender equality aser human trafficking’ indang onük lemsatep.
Tetsür-tebur bendanga amshiba inyakyim ya loktiliba ajak nung ajurur aser iba ya nokdangtsü atema Linük temzüng nunga lateta lir. Yimtenren, lokti mesüra rongsenkettsüng tsütsü tetsürtemi tetsükdaktsü ajurur, ajisüaka tetsürtem ya meimchir ta angatetet akhümtsübutsüla, ta Cheliam-i ashi.
Nisung shibelenba dak sendakba onük jembidang, iba ya sen bushiba maparen ka kümogo aser yimtsüng tia nung aliba tanur aser tetsürtem aika iba maparen ajanga takoksa ajurur. Anungji, arogotemi item onük asoshi tebilemtsü abentsüla aser nübortem angatetdaktsütsüla, ta laisa shisem.
Sentong nung Retainer Lawyer, Yimtsusangla Chang-i ‘cyber crime and its legal implications’ aser Panel Lawyer, TDLSA, Antimangyang Chang-i Victim Compensation schemes kübok ken o benokba, senior citizens aser POCSO Act indang temetettsütem lemsatep.
Sentong nung mendenji Para legal Volunteers Tuensang, Hongsa Yemjong liasü aser Chang Baptist Church, Saksi 3rd NAP Sector Pastor, Imlong-i temoatsü meshia sarasadem.