France nung tir asütsü tenangzükba agiogo

May 14, 2017 nü French president Emmanuel Macron (achijilen tejaklen alisang) Elysee Palace, Paris, France nung pa mapa tenzükba sentong nung adenba noksa nung ngur.  Pa ya France nung ti buba tir asütsü atema Deobar nü tenangzükba agiogo.

Paris, May 14 : France nung 25 buba tir asütsü asoshi Independent-centrist aser taoba investment banker Emmanuel Macron tanü Deobar nü tenangzükba agiogo. Tang tashi nung French tir inyaka aruba rongnung pa tanubusang asütsü.
French tir inyaktsü tenangzükba agiba sentong ya nung Constitutional Council tir, Laurent Fabius-i ketdangsüa liasü ta BBC osang ajanga metetdaktsü.
Pei lima asoshi nisung ka asütsü atema, nisung kaji pei putu nisung asütsüla. Nübortemi tematiba tashi amshia shimba nisung, naji ajak dak alaka, asen lima asoshi shimba nisung aser tir lir ta Fabius-i arishi küm 39 tain Macron indang metetdaktsü.
Iba mapang Macron kinungtsü US tir Trump taküm küm January nung US tir inyaktsü tenangzükba agidang pa kinungtsü US First lady Melania Trump-i agiba süoshi den mesüktepa agir la kinungbo jakdang Palace jagi ait.
Macron-i pa tir asütsü toktepba election nung Right National Front leader Marine Le Pen akok.
France nungertemi teti sayubaji alimai nüngdaker. Mapang talangka France-i lasasa la dak temulung malemtsüsa lia aruogo, saka tangsa alimai aser Europe-i France tenüngdakba, ta tir tasenba ama ken o lapoka jembidang Macron-i metetdaktsü.
Nübortemi ni shimba ajanga French nungertem nem parnoksasa parnok dak temulung lemteta alitsüsa mapang ka meyipa agütsütsü ta paisa metetdaktsü.
Paisa ashiba agi, pai nübortem dang France nunger tashi majem aser onok tang asentenshiba mapang lir ta metetdaktsütsü. Marcon-isa taoba French tirtem Charles de Gaulle nungi Nicolas Sarkozy aser Francois Hollande tashi nem akümtsübu agüja tenüng sanga liasü.
Tanü nikongdang nungi ni mapa inyak tenzüktsü. France putu aika lidakjang, ta Macron-isa metetdaktsü.France yimten otsü nung 1848 küm Napoleon Bonaparte arishi küm 40 nung lenir akümba sülen tang Macron arishi küm 39 nung tir akümer.
Tanü Macron ya pa tenangzükba agidak tesem jelia atong aser pa agizüktsü renemdagi aodang Hollande-i pa agizük. Pai tan Bodbar nü prime minister aser cabinet-tem shimtsü.