Lionel Richie nem honorary degree agütsü

Massachusetts, May 16, (Agencies): Boston, Massachusetts nung aliba Berklee College of Music ajanga Lionel Richie nem music degree indang honorary doctor agütsüogo.
Arishi küm 67 tain, Lionel Richie ya Grammy pongu, Oscar ka aser Golden Globe ka ngua lir.
“Contemporary sobaliba nung pai teyari agütsüba, meimchir asoshi mapa tajung inyakba aser pa indang ken ajanga nisungtem nem tepela bener arutsüba asoshi Berklee indang ‘honorary doctor of music’ ya Lionel Richie nem agütsür,” ta Berklee indang tir, Roger H. Brown-i iba sempet agütsüdang ashi.
“Lionel ya kenten menu nung tsüngrem amai lir. Nai kechi mapang Lionel Richie ken angati, nai iba ken mezüng angadanger amai kümdaktsür,” ta nüngtugu kentener, Pharrell Williams-i Lionel tenüng toshia zülutsü.
Iba sentong nung Lionel-ia kaketshirtem dang ajungshi o shia liasü.
“Alimai kechi nüngdaker ibaji shitettsüsa langpang nung nünok tanü mena lir,” ta kaketshirtem dang pai ashi.
Pa tain kümaka pai kentenmenü meimba mesamar, ta Lionel-i tamalena shia lir.
Ken atentsü ya pa indang mapa masü saka pai jangraba lir, ta shia lir.
“Ibai ni jangraba mapa tajungtiba lir aser iba mapa ya kü taküm tepiyong alitsü. Ni joko tain akümer ta ni küm shia bilemer. Saka ni shilem agiba nung ni saburtem jangratema ali tashi ni iba sapang metoktsütsü,” ta Lionel Richie-i tawa shia liasü.
“Nüburtem tali arur, anungji ni kotaser anentsü? Ni kanga pela lir,” ta pai shisem.