AICC-i Northeast state 3 atema Minority Observer shim

New Delhi, May 15 (Agencies): Northeast state asem- Assam, Arunachal Pradesh aser Manipur nung tamakok anguba sülen All India Congress Committee(AICC)-i election agitsü aliba state asem nung takok angutsü atema alizüng yur mapa inyaker.
Northeast kübok Meghalaya, Nagaland aser Mizoram nung sangküm assembly elections agitsü lir aser iba atema AICC-i minority observer shimogo.
Taruba elections nung takok angutsü atema Congress nung minority wing-i tongti shilem agitsü, ta party osang ka ajanga metetdaktsü.
All India Congress Committee (AICC) nung Minority Department-i Meghalaya, Nagaland, aser Mizoram state tem nung aliba AICC Minority Department Observer inyaktsü atema Assam nungi Rejaul Karim Laskar shimogo.
“Laskar-i state asem nung minority department tem den yariteptsü. Sangküm state asem nung assembly elections asoshi nendaka inyaktsü atema pai minority department tem den shisa lemsateptsü” ta party osang ajangasa shisem.
Laskar ya Assam Pradesh Congress Committee (APCC) nung taoba Spokesperson aser AICC Vichar Vibhag nunga taoba Secretary lir. All India Congress Committee nung Minority Department ajanga nübo agi tangar memenepertem (Christians, Muslims, Sikhs, Buddhist, Jains & Parsis) dak sendakba onüktem atema inyaker.
AICC Minority Department-i Observer dang state asem mapang shia semdangtsü aser Congress party state lennirtem aser minority lennirtem den amalitepa yariteptsü tetuyuba agütsüogo.
April 27, 2017 nü Laskar-i Northeast tesem nung Congress telok tashi itshitsü atema AICC Minority Department nem tapak 148 report ka agütsü.
Pai agütsüba report nung Congress Party-i Northeast kübok Minority wing nung Khristantem teimba shimoktsü atema shia lir.