District 100 nung arishi küm 30 temapurtem temang tendangtsü

New Delhi, May 16 (Agencies): Linük nung district 100 nung arishi küm 30 see temapurtem Non-communicable diseases (NCDs) pungu tendanga reprangtsü.
Iba ya NCDs pungu universal screening aser control maparen nung mezungbuba shilem asütsü.
Iba maparen ya linük ajungalen inyaktsü aser tashidak nokdangtsü atema nisung crore 50 shi jungnüa temang tendanga reprangtsü, ta Health Minister J P Nadda-i ashi.
Mongulbarnü New Delhi nung, hypertension, diabetes aser cervix, breast o oral cavity cancer tem indang universal screening & control national training nung jembidang Nadda-i iba osang metetdaktsü.
“NCDs ya taküm nung melamela atongba tashidaktem lir aser item tashidak anepalutsü nung sen aika endoker. Iba tebilemtsü atema health ministry-i sentong kar inyakdar” ta paisa ashi.
Sentong kübok tanur shia vaccine preventable diseases 11 indang mozü agütsütsü lir aser iba asoshi National Health Policy 2017 nung teinyaktsü enokogo.
Tesüiba küm ana tsüngda linük kübok district 400 den teimba nung NCD clinics lapokogo, ta Health Minister-isa shisem.
Sentong nung Union minister Anupriya Patel-ia o jembidang, NCDs indang tebilemtsü ya kanga tulu kümogo aser küm shia item tashidak ajanga nisung lakh 90 jungnüa asür, ta ashi.
Linük nung nisung crore 7 shi ka diabetes agi shiranger aser crore 7-8 tsüngda cardio-vascular tashidaktem ajanga timtemer. Kümshia cancer agi shiranger nisung lakh 13 shi asür, ta laisa metetdaktsü.
“Tasübatem ajanga asenok dang tebilemtsü tulu ta sayur. Item tashidak ya asen libaliro mazüokba ajanga teimba adoker aser nokdangtsü akok” ta Anupriya Patel-isa metetdaktsü.
Tanü sentong nung Nadda-isa ASHAs aser ANMs aser providers, staff nurses o medical officers atema training modules 4 sayatsü.