CBI-i Chidambaram aser Lalu’er kitem mita reprang Arun Jaitley-i jungkai adokba anogo tongogo ta ashir

New Delhi, May 16 (Agencies): Mongulbarnü CBI-i opposition lennir ana- P Chidambaram aser Lalu Yadav na indang ki densema tesem 50 shi mita ao.
“Nisung aika atema jungkai adokba anogo tonga aruogo, parnok ajaki telangzüba agütsütsüsa akümtsü” ta tanü Finance Minister, Arun Jaitley-i ashi saka opposition lennirtemibo sorkari parnok den tokteper anema ozüng amshia mapa inyaker ta aitsü.
Tanü Chennai nung CBI-i Chidambaram’er ki mita ao. Pa ya Prime Minister Manmohan Singh-i aniba sorkar nung Finance Minister liasü.
2007-2008 nung Chidambaram-i INX Media Private Ltd nem foreign investment laws alema mapa inyakdaktsütsü atema par jabaso Karti Chidambaram nem sen crore 3.5 agütsü, ta CBI-i ashir.
INX Media ya 9X Media Private Limited ta nüngja melen aser iba mapang Indrani o Peter Mukerjea na kibur liasü. Tena ya Sheena Bora tepsetba ken o nung tai tonglokja tepuokdak yua lir. Sheena ya Indrani’er jala liasü.
Chidambaram-i ashiba agi, pa office nung alidang pa mesüra Foreign Investment Promotion Board (FIPB) ketdangsertemi ken o kecha aika ketdangsüa reprangba nung aibelena inyakba onük ka danga maliasü.
Ano, par jabaso Karti Chidambaram-ia Chennai nung par kima osangbener dang, “ni tai tongloktsüba onük pusemtsüsa kuli kecha mali aser iba ya yimtenren mapa ka dang lir” ta metetdaktsü.
Külen, Lalu Yadav dak sendakba ken o atema CBI ketdangsertem aser police 100 jungnüa tanü Delhi aser Gurgaon nung kiojen aika mita ao.
Kiojentemji Lalu aser par tanurtem indang lir aser sen crore 1,000 shi alang lir, ta CBI-i temulung melemi bilemer.
Iba inyakyim atema Lalu-i Twitter nung pa aitsütsü merangertem atema meima bilemtsür ta metetdaktsü.
Pai sorkar lutsüba atema merenshitsüba dang masü saka taküm August ita pai ayongba rally thitemdaktsütsü atema BJP-i meranger ta Lalu-isa metetdaktsü.
Iba rally nungji Congress tir Sonia Gandhi aser West Bengal Chief Minister Mamata Banerjee na dena BJP den tokteper lennir aika adentsü sentong lir.
Taoba mapang, Bihar nung osangbener senden balala ayonga agidang BJP-i Lalu’er kibongi ochimashi mapa inyakba kulikakettem lir ta sayua liasü.
Arishi küm 68 tain Lalu-i 1990s mapang Bihar Chief Minister inyakdang ochimashia inyak ta okdaki aitsüba ajanga pa public office nung shilem magitsü nokdanga lir. Ajisüaka, par jabaso ana- Tejashwi aser Tej Pratap na Bihar teloktep sorkar nung minister tem lir.