NLFT pur asentenshidar: Police

Agartala, May 16 (Agencies): Taruba küm Tripura nung assembly election madong tsüngda, nokdanga aliba telungpur telok National Liberation Front of Tripura (NLFT) pur timtem agütsütsü asoshi asentenshitsü merangdar, ta Mongolbarnü police ketdanger kati ashi.
NLFT puri tawa Biswamohan Debbarma melena Subir Debbarma tir shimogo aser Biswamohan advisor kümdaktsüogo, ta itangitertemi osang agütsüba police ketdangser kati metetdaktsü. Ketdangser-isa ashiba agi, southeast Bangladesh kübok Chittagong Hill Tracts (CHT) nung amenloker aliba NLFT telok yagi taruba küm election madong tsüngda timtem agütsütsü asoshi asentenshidar.
Chief Minister Manik Sarkar-i Hombarnü southern Tripura, Belonia tesem nung lokti senden ka nung ojembidang, NLFT pur lenir melenshiba jangjashitsü aser parnok maneni asentenshir temai adoktsü aliba nung kümdangshia alitsü asoshi metetdaktsü.
“Yimten yimsüsüba nung opposition party nungi lenir kari assembly election madong tsüngda timtem agütsütsü asoshi NLFT lenir tasen den tongteptsü merangdar. Paronki ano state nung terenlok maparen balala nung meinperongba den külemi yimjung raksatsütsü asoshi merangdar,” ta Home portfolio dena bensemer alisang CM Sarkar-i ashi.
“NLFT puri 2000 küm Tripura Tribal Areas Autonomous District Council amokbangtsü asoshi tribal lokti ka yaria liasü. Parnoki iba maparen nüburtem amokmerena inyak,” ta paisa ashi.
Police ketdangsertemi ashiba agi, NLFT pur lenir tasenba Subir Debbarma ya western Tripura Mohanpur sub-division kübok Bargachia nungi lir aser pa NLFT nung mapang talangka nungi züngsemer inyaka arur. 2013 kü pa pua liasü saka sen agütsür chiok, iba sülen pa tanaben NLFT telok nung mezüngsem tsüngda Bangladesh-i ao.
Ketdangsertemi ashiba agi, 2015 aser 2016 tsüngda Tripura nung telungpurtemi timtem agütsüba kecha meliasü koba 2005 nung küm 10 tejakdangbo telungpur dak sendakba nung lendong 115 ataloka liasü. Iba lendong nung nisung 130 asü aser 65 tashi pur ao. 1998 küm ozüngalema inyakba telungpurtemi nisung 360 shi khaset aser tebur 390 pua bener ao.