Delhi nung NSCN (K) lenir ka puogo: Police

New Delhi, August 18 (Agencies): South Delhi, Lodhi Road tesem nung Delhi Police, Special Cell-i Naga nunger telungpur NSCN (Khaplang) nung tongti lenir ka puogo, pa den yariteper ka ajurutsü asoshi pa iba tesem jagi aruba liasü, ta Mongolbar nü police-i ashi.
Hombar aonung tesü Lodhi Road nung aliba India Habitat Centre kima Nagaland, Peren district nungi arishi küm 50 Ngamsinlung Panmei apu, ta police ketdangser kati ashi.
Pa apuba ya takok tulu ka ama züngshir kechiyong police-i ashiba agi pa ya NSCN-K nung Health minister lir.
Special Cell DCP Rajiv Ranjan-i, Panmei ya o jembitsü nung tsüngro kanga tasong aser Khaplang atema political advisor tongti ka aser telok fund-raising aser recruitment mapa nunga tekolak, ta ashi.
Osangbenertem senden nung jembidang Ranjan-i, Manipur nung amakba indang jangjatsü asoshi pa dang asüngdangyadagi, ta ashi.
Ajisüaka pa den yaritepsangjibo tang tashi mangur aser Panmei-i linük yimtiba semdangba kuliji mejangjar, ta police-isa ashi.
July tanabuba hopta nung Panmei Delhi tonga aru aser tanü pa okadaki anir oa ken o benokba sülen, pa August 24 nü tashi judicial custody nung ayutsü temelaba agütsü. Pa south Delhi, Mahipalpur tesem nung para ki ka nung anenzüka liasü, ta police-i ashi.
Panmei ya tesüsabuba Myanmar, Taga region nung angu, kong pai NSCN(K) council headquarters nung SS Khaplang ajurur südi ta bilemer, ta Ranjan-isa ashi.
Police-i pa ket nungi mobile phone pongu, SIM card tenet aser laptop ka puogo.