NNC-i 66 buba Naga Plebiscite Day amung

Kohima, May 16 (TYO): Mongulbarnü Naga National Council (NNC)-i Chedema Peace Camp nung 66 buba Naga Plebiscite Day ayongzüka amung.
Iba sentong nung Kohima Local Ground nung Naga nungertem plebiscite atema adenshiba noksatem aser kulikakettem sayuba den taoba NNC President, AZ Phizo-i taoba India Prime Minister, Jawaharlal Nehru dangi züluba shiditem zünga metetdaktsü.
“Naga nunger atema küm ajakji senti lir aser küm 66 tejakdang, iba kasa anogo nung NNC-i Indian Union nung madentsü ta meyongnem agütsütsü atema Kohima nung sentep” ta tanü NNC President, Adinno Phizo-i ashi.
1951 küm national plebiscite agidang, Naga nunger 99.9%-i India kübok madentsü atema meyongnem agütsü, ta laisa ashi.
“Maparen ajak yimjak nung inyak aser shiditemji pongdang nung sepbang. 1954 matongdang Nagaland nung tetsübu kecha maliasü. Naga nunger tazünger karidang nüjiso atema jembir ta India-i bilemba agi plebiscite agitsüsa mapang ajuru, aser iba ya ajanga India aser alima dang Naga nunger nüjiso indang osang tejangja sangoktsü” ta Adinno-isa shisem.
Plebiscite nung shilem agir aika asenok den dena mali saka asenoki parnok teti bilemtettsü. India-i sepai tashi amshia asen linük madak tashiyim agi yimsü asüba ajanga, tanü asen linük tensa mejungi lir, ta laisa shisem.
Naga nunger kari asen tsükchir (India) den yimtenren mapa inyaker saka item nisungtem jagi Naga nungeri India dang nungi kecha makhanger ta metettsüla. Tang tensa ajurua aliba ya India-i tashiyim agi yimsü asüba ajanga lir aser India-i Nagaland toktsür ora, iba khuret melamela koktettsü, ta NNC President-isa metetdaktsü.
“Naga nunger ya India nunger masü aser Nagaland ya India nunger litsü masü. Iba ya tejangja aser putiotsü nung ashishitep kecha maliba ochi lir” ta laisa shisem.
Iba sentong nung mendenji NNC CEC Member Kolezo Chase liasü, Phom Baptist Church Kohima, Pastor Rev. Phomlee Van-i temoatsü meshia sarasadem aser Rengma Baptist Church Kohima nungi Day Spring-i ken ka aten.