2018 Oscar sentong Jimmy Kimmel-i host asütsü

Los Angeles, May 17 (Agencies): Taküm Oscar sentong kanga dang takok ngua leniba sülen nüngtugu TV host Jimmy Kimmel-i 2018 Academy Award sentonga paisa host asütsü.
Pai 90buba Oscar sentong 2018 March 4 nü agitsü alibaji host asütsü aser Michael De Luca o Jennifer Todd nati produce asütsü, ta osang ka ajanga metetdaktsü.
Iba osang ya Academy of Motion Picture Arts and Sciences-i Mongolbarnü Twitter ajanga metetdaktsü. “Shingaia Jimmey Kimmel, producers Michael De Luca o Jennifer Todd nungeri ayongba amai benjung mayongzüktettsü! Oscar 90buba nung shilem agitsü pelashishi jaoker,” ta parnoki zülutsü.
Kimmel 89buba Oscar nung shilem agitsü asoshi maongka angu, saka sentong tatemi best picture award meyoktepa Moonlight melena La La Land adok ta osang sangdongba tatalokba ajanga pai shilem tajung agiba ajak amokbangadok.
Jimmy Kimmel Live! Show ya India nunga Star World aser Star World HD nung sayur aser iba nung host Kimmel-i twitter ajanga Oscar sentong nung osang aibelena agütsüba indang Twitter nung asaya menüa liasü.
“Oscar sentong tanaben host asütsü asoshi kü dang asüngdangba atema kanga pelar. Ni envelope shidak lapok ta amanger,” ta pai post sütsü.
“Oscar sentong host asüba to kü career indang highlight liasü. Nenoki taküm oscar tatembang onoki benjatsü ta bilemra 90bubu anniversary show atema onoki kechi renema ali ataa liang,” ta academy ajanga osang ka sangdongba dak sendakba nung Kimmel-i asaya menüa ashi.
De Luca aser Todd natia iba sentong nung shilem agitsü asoshi yongyaa bilemba lemsatep. “Taküm nung kendang ajangshidangtsüba sentong nung aibenbo anaben tashi shilem agitsü asoshi maongka mangur aser ano ajia 90buba oscar nung shilem agitsü asoshi lir,” ta denati ashi.