Trump-i Comey dang Flynn indang bushisüngdang anentsü ashi: Reports

Washington, May 17 (Agencies): Taoba mapang White House national security adviser, Michael Flynn aser Russia tsüngta tesendaktep aliba ken o bushisüngdangba anentsü asoshi FBI Director, James Comey dang US tir, Donald Trump-i ashi, ta Comey-i züluba memo angur ka ajanga ashi.
Trump-i Comey mapa nungi anentsüba aser Islamic State of Iraq & Levant (ISIL) indang national security information onüktem Trump-i Russia Foreign Minister, Sergey Lavrov den jembiba ajanga White House nung rongrong tulu adoka aliba mapang iba osang ya Mongulbarnü sangdong.
The New York Times ajanga mezüng sangdongba agi, Comey memo indang osang ajanga Trump-i federal investigation nung teka amok asü, ta tasüngdangba arutsü.
Taoba küm Donald Trump aser Russia ambassador, Sergey Kislyak tsüngta sensaksemba osang tai Flynn-i US tatong tir, Mike Pence nem sangoktsüba ajanga February 14 nung Trump-i Flynn ya mapa nungi anentsüba sülen Comey aser Trump-na Oval Office nung ajurutepba sülen iba memo ya Comey-i zülu.
White House-i iba osang ya tai ta ashir. “General Flynn densema aliba bushisüngdang anentsü asoshi tir-i Comey dang aser shingadanga bushisüngdangba osang mashi,” ta sangdong.
“Tir, Trump-i Michael Flynn indang ken o bushisüngdangba nung teka amoshia shilem agiba kuli tejangja ya James Comey-i ashitsü mapang arutsü. Aser iba ajanga telemsa tulu adoktsü,” ta osang ajanga ashi.
Oval Office nung senden amendang sorkar otsütem temai adoka osangbener aser media balala nem metetdaktsüba Trump-i aitsü aser item meyim osang sangdongba ya FBI director-i bushia tapet temerenshi agütsütsüla, ta ashiba osang ka New York Times ajangasa ashi.
“Iba kuli ya Tir aser Comey-na tsüngda jembiba ama masü aser tejangja masü,” ta White House-i maneni ashir.