North Korea nung Khristan renloka aoer: Kim Chung-seong

Washington, May 16 (Agencies): North Korea nungi jena aoer Kim Chung-seong tang Khristan missionary ka ama inyaker aser pia ashiba agi, Khristantem reshikangshiba asüba linük tamajungba asüyonga North Korea nung arogo inloka odar.
“North Korea sorkari tetsübutibaji Osangtajung prokshia aotsüba lir, kechiyong Laishiba aser Osangtajung ajanga ochi jembir. Tammang takdang ka nung tesangwa yalokra, takdangji tesangwa akümtsü” ta Washington, D.C nung World Summit in Defense of Persecuted Christians alidang Kim Chung-seong-i ashi.
“North Korea sorkari nokdangtsü merangaka, Khristantem tamang tulu küma odar aser inloker. Sorkari North Korea nung Osangtajung nokdangtsü atema parnoki akokba tashi inyaktsü, saka asenoki asen teka agi anü tesangwa menokdangtetba ama lir” ta paisa shisem.
Linük 60 dak tema nung reshikangshi ajuruba Khristantem yariba telok- Open Doors-i ashiba agi, North Korea ji Khristantem kanga reshikangshiba linük lir.
“North Korea nung Khristantemi sorkar ketdangsertem, kidangertem aser karbo pei apuani mesüra tanur dang miimshitsüsa tia ajurur. Nisungtemi tali tenük yokba aser nüka mitba ajanga tamangertemi tenük lapoker ang sarasademer aser tetushi mesüra tekülem atema senteptsübaji tamakoktsü” ta Open Doors-i ashir.
“North Korea nung senso ajaki Kim’er kibong külemtsü atema ozüng lir ajak aser shirnoki iba tetuyuba sülen manidakdir, parnokji apur, tepuokdak ayur, reshikangshir mesüra tepseter. Khristan kibong ajunga hard labor camps nung puoker aser parnok kümshia reshikangshi, tali belemba aser yatzüra ajanga asür.” ta parnokisa ashi.
Nisung kar linük toktsür China adena South Korea-i aotsü merangdang pura, parnok tepseter mesüra taküm piyong atema tepuokdak ayur, ta Open Doors-isa metetdaktsü.
Kim Chung-seong-i alima nung Khristantem dang North Korea nung tamanger tem aser tamangba nüjiso angutsü atema sarsademjang ta mepishia metetdaktsü.
“Ni alima nung Khristantem dang North Korea Khristanpurtem atema sarasademjang ta mepishir” ta pai osangbener dang ashi.
North Korea sorkari taila network-i Korea Christian Association ta ser amshir. Iba ya ajanga parnoki tangar dangbo tamangba yimsü nüjiso agütsür ta sayur saka shitakbabo parnoki iba network ajanga linük nung Khristantem metettsü meranger, ta Kim Chung-isa metetdaktsü.
Kim-i Far East Broadcasting Company den yaritepa, North Korea dangia USB drives aser SD memory cards ajanga Laishiba osang, Khristan ken aser alima osangtem yoker, ta CAN-i metetdaktsü.
“Ajak dang tongtipangtiba mapaji North Korea nunger temulungjang nung Yisu Khrista lidaktsütsü atema lir, kechiyong ochi ajanga na talenba nung salatsütsü. Ozü North Korea adianu ajak dangi iba ochiji atongtsü aser angatettsü atema sarasademtsür” ta Kim-isa metetdaktsü.