Muslim sayutsüngir kati FIFA dang kangki tamaitsü sayuba nokdangtsü tuyuba aitsür

May 12 (Agencies): Muslim cleric kati Twitter nung FIFA dang Khristan asayartemi goal agütsüba sülen kangki tamaitsü sayuba nokdangang ta ashiba atema nisungtemi pa aitsür.
Saudi nung tamangba lennir aser King Saud University, Riyadh nung professor of religion, Mohammad Al-Arefe-i tawa tu Twitter nung, “ni asayartem indang video clips nguogo aser parnoki takok anguba sülen parnok teku nung kangki tamaitsü sayur. Iba ya FIFA-i nokdanger asü masü” ta metetdaktsü.
Al-Arefe-i Twitter nung pa sülen anidaker million 17.4 den iba ashishitep aketba osang sangdongba sülen, nisung aikati pa aitsütsü tenzük.
Italy club Roma nungi Egypt nunger football asayar ka atishia, nisung kati “Ni tiyazü meshitettsü. Mohamed Salah aser tangartemi goal agütsüba sülen apudaker sarasademer aser shingaia parnok memerenshir. Saisapong ketdangsertem nem saisapong dak sendakba maparen yujang” ta metetdaktsü.
“ISIS-i kangki tamaitsü mamshitsü nokdanger. FIFA nung Tir inyaktsü atema al-Baghdadi (ISIS tanishisang) shimba sülen, asenoki Al-Arefe indang onükji jembidi” ta nisung kati pa luja langzü.
Ano, nisung kati “Khristan, Sunni aser Shia nunger telok ka nung temulung ka küma longjemdaktsüba saisapong nung tebang tait. Nisung ajaki pei tamangba yimsü sülen anidaktsüla. FIFA moajang” ta metetdaktsü.
Sunni nunger sayutsüngiri tali bilemloka oa Islam amanger aser pa ya alima nung aikati meteta lir aser ashishteper. Pai Islamist nunger dang Syria nung oa raratsü ayongzükba sülen linük aikati pa marutsü nokdanger.
Tan ita tetenzüklen tu Denmark-i küm ana atema Al-Arefe nokdangba osang metetdaktsüogo.
“Sorkari Denmark nung tesempatsü osang prokertem marudaktsütsü. Sayutsüngirtemi Danish nunger dang tetsür aser tanurtem dak tashiyim mapa inyaktsü, caliphate ulushitsü indang tebilemba lemsateptsü aser asen linük tamendakdak anokshitsü ajungmesotsü memelatsü” ta Immigration Minister Inger Stojberg-i ashi.
“Item ama nisungtemji Denmark-i arutsü memelar” ta paisa shisem.
Shia Muslim Al-Khoei Director, Yousef Al-Khoei-ia ashiba agi, Al-Arefe-i telemsa adokdaktsütsü indang jembir.
Tesüiba mapang Muslim nunger sayutsüngir Al-Arefe-isa, kinungbo kati kinungtsü azüoktsü atema züka merenshi nunga kecha masü, ta ashi.