ACAUT Nagaland-i jangjashitsür

Dimapur, May 17 (TYO): April 24, 2017 nü osangkakettem nung sangdong ka agütsüba nung nisung karibo NSCN-IM-i saru agiba nung ACAUT Nagaland-ia pusema nungiter ta aibelena angateter saka ACAUT-i saru saruba atema telok shinga pusema menungiter, ta tanü Media Cell sangdong ka nung metetdaktsüogo.
NSCN-IM-i employee salary tax 24% nungi 12% ajemtsü telemtetba agiba nung ACAUT Nagaland-ia pusema nungiter ta nisung kari mashileni angatet. Ajisüaka, Naga yimten teloktemi saru saruba nung ACAUT Nagaland-i shinga pusema menungiter aser nübortemi akhangba ‘Sorkar Ka Saru Ka’ ta tangatetba nung masetshii nokdaka lir, ta Media cell, ACAUT Nagaland nungsa shia lir.
NSCN (IM)-i ‘Syndicate’ aser ‘dealership’ system agientsü telemtetba agiba ang pelaa agizüker ta taoba sangdong nung ACAUT-i metetdakja liasü, ta parnokisa shisem.
ACAUT-i ‘Sorkar Ka Saru Ka’ ta asüba nung temelenshitsü kecha masür aser nübortemi aginüba ama matalok tashi, shishilembar/sorkar mapa inyaker mesüra kija shingaia Naga yimten teloktem nem saru magütsütsü tetuyuba agütsür, ta ACAUT Nagaland-isa nenshia metetdaktsü.
Sorkar mapa inyaker karidanga telungpur telok nem ozüng alema saru agütsüra, parnok anema ken o benoktsü. Maneni, ACAUT Nagaland-i Naga yimten telok ajak dang ‘Sorkar Ka Saru Ka’ ataloktsü atema mapa inyaktsü mepishia metetdaktsür, ta sangdong nungsa ashi.