Nagaland nung party tasen ka tenzükogo

Dimapur, May 17 (TYO) : Nagaland nung general election agitsü ita ishika dang lia, tanü Bodbar nü party tasen ka tenüng agi Democratic Progressive Party (DPP) tenzükogo. Iba senden ya Dimapur nung liasü
Tanü tenzükba yimten telok tasenba DPP nung tirji taoba Lok sabha MP, Chingwang Konyak aser tezülurtem rongnung tongtiji Abu Metha asütsü. Tena den tadong tir pongo aser tongti zülur asem shimogo.
Iba telok sangdong ka nung ashiba agi, iba telok yagi Naga yimten tebilemtsü indang yimjung nung latettsü asoshi jembia aliba maparen nungittsü aser tekaratiba nung telemtetba agitettsüsa yaritsü. Iba nükjidong ataloktsü asoshi nübortem den shisalemsatepa inyaktsü aser Naga nunger telongjem atema temulung agütsütsü ta parnokisa metetdaktsü.
Iba yimten telok tasenbai democratic inyakyim aser nükjidong angateta inyaktsü aser ochimashi, tashiyim aser tim masüba mapatem ajak anemtsü. DPP teloki ochishia inyaktsü aser nübortem temeten akümtsübua amshitsü, sensakertem yaritsü aser Naga nunger sobaliba tajung kümzüka ayutsü merangtsü ta parnokisa metetdaktsü.
DPP-i lokti temenentem anema nokdaktsü aser tajungtiba shimba maparen tenzüktsü aser pei dak aketba sempet amshia peisasa purapiteta inyakba mapatem takok tashi yaritsü ta parnokisa sangdongogo.
Iba telok yagi nübortem ola aser taginüba angateta inyaktsü aser ‘regional’ party tangateta nung national party mesüka inyaktsü aser alima nung tzü mopong menenba tebilemtsütem jembiba nung shilem agia inyaktsü ta parnokisa metetdaktsü.
Nübortemi temelenshi ka aginüa jembiba ataloktsütsü asoshi iba telok ya tentet, anungji nübortem atema shirnoki inyakner aser Naga yimten tebilemtsü akoktsü atema shirnokisa shilem aginür, parnok ajak iba telok nung adentsü asoshi kishi lapoka lir ta parnokisa metetdaktsü.
Tanü DPP mezüng lokti senden agiba sülen DPP tir Wb.Chingwang Konyaki anir mezüng mezüng Central Executive Board senden ka menogo.
Iba telok ya official-ibo Election Commision nungi temelaba ngur külenang tenzüktsü ta parnokisa metetdaktsü.
Iba telok nung tadong tirtemji Nuzota Swuro, Dr,Chumben Murry, K.Sukhalu, Sr.Sukhato aser Menuovilie shim aser tongti zülurtemji Rusemtong Longkumer, Benjamin Lorin aser Pausi Zeliang shim. Iba telok nung senyurji Dr.John Murry shimteta lir.