ISL nung shilem agitsü asoshi East Bengal-i bid asayatsü

Kolkata, May 17 (Agencies): Indian Super League (ISL) nung shilem agitsü asoshi East Bengal-i bid asayatsü atema document meshiogo aser Mohun Bagan-ia kasa mapa inyaktsü südi.
“Bid asayatsü atema jaokba document tanü onoki Mumbai nungi meshiogo. Saka iba ajanga onok ISL nung shilem agitsü kuli tejangjabo magütsür. Kechi maongka sa aliar jungjunga meshisadang tashi tzüyim nung tetsüng majemoktsü. Onoki shisadangba sülen tejangja metetdaktsütsü,” ta East Bengal telok indang tongti zülur, Kalyan Majumdar-i ashi.
ISL nung shilem agitsü asoshi bid asayaba nung adentsü atema anu telemtetba magi, iba atema tang jembishinüba mapang lir, ta Mohun Bagan indang tongti zülur, Anjan Mitra-i ashi.
Iba maparen asoshi ita asem tashi jembishinüa arutagi, ta osang ka ajanga ashi.
“Invitation To Bid (ITB) nung kechi aliar parnoki meteta lir. Europe nungi international club anatia ITB atema tejangraba aliba sayuogo aser ISL office den jembishinüba mapang ka lir,” ta Anjan Mitra-i ashi.
ISL ayonger, Football Sports Development Limitet ajanga May 12 nung ITB ajanga tender agütsü aser iba ITB ya May 25 tashi nung ISL ket tongtsütsü metetdaktsü. Taküm ISL nung team asem tali bendenloktsü lir.
Iba ajanga East Bengal aser Mohun Bagan-i ISL nung Bengaluru FC den külemi asayatsü asoshi lenmang lapoktsür ama lir. I-League melena ISL ya tuluba kümdaktsütsü mechi All Indian Football Federation ajanga Bengaluru FC nem ITB meshidaktsü.
Kolkata Giant-ia iba bid document ya meshitsü imlar.