Amit Shah-i Centre sorkari küm 3 nung inyaktetbatem metetdaktsü

New Delhi, May 20 (Agencies): Honibarnü Bharatiya Janata Party (BJP) Tir, Amit Shah-i Narendra Modi-i aniba sorkari tesüiba küm asem tsüngda inyaktetba tongtibang mapatem indang metetdaktsü.
Tanü New Delhi nung BJP office ka semzüktsüba sülen osangbenertem senden nung jembidang pai sorkari inyaktetba tongti mapatem osang metetdaktsü.
2019 küm Lok Sabha election nung BJP-i melamela takok angutsü nükjidong nung tang BJP Tir, Amit Shah-i anogo 95 tashi linük tesem ajaklen sema senzü tenzükogo.
Shah-i Other Backward Class (OBC) telok dang, “Modi’er sorkari OBC Commission nem Constitutional jenjang agütsübaji teinyaktetba tulu ka lir,” ta ashi.
Congress party aitsüba olen ka nung BJP tongti lenirisa, “Modi’er sorkari linük nung kibong ka yimtenren anentsüogo,” ta ashi.
Ochimashi sen anema demonetisation mera agiba atema Shah-i Ato kilonser, Narendra Modi nem tenüngsang agüja jembi.
“Yimtenren tabensaba akumtsü aser tashitait akumtsü, iba den külemi nübur tenzükba nung ochimashi malitsü atema Modi’er sorkari mera tajung aika agiogo,” ta Shah-i ashi.
Swachh Bharat Mission dak sendakba nung pai, “Ato kilonseri iba atema mera agia inyakba ajanga linük nung metsümeshidak crore pezü yangluogo,” ta ashi.
BJP züngsem kanga züinba dak sendakba nung pai, “BJP ya züngsem 10 agi dang tenzük, saka tangbo party züngsem crore 11 dak tema lir aser ibaji alima nung yimtenren party tulutiba lir,” ta ashi.