Syria nung Islamic State-i civilian 19 tepset

Beirut, May 20 (Agencies): Islamic State züngsemtemi Syria kübok yimtsüng ka nung tanur ana dena civilian 19 tepsetogo, ta Honibarnü Syrian Observatory for Human Rights-i metetdaktsü.
“Hokolbar nikongtsütsü IS kiralongrartem Jazrat al-Boushams yimtsüngi ao aser civilian 19 tepset. Tasürtem rongnung tetsür ana aser tanur ana dena liasü. Parnoki tekolak nung injang agi khaset aser iba sülen mangtemji mi agi rongdok” ta SOHR tekolak Rami Abdel Rahman-i ashi.
“Nisung kar yimdong nung putener tepset aser kar kidang lia tepset” ta Rahman-isa ashi.
IS kiralongrartemi Syrian Democratic Forces alliance (SDF) züngsem asem pur anir ao, ta paisa shisem.
SDF ya Kurdish-Arab telok ka lir aser IS den rara nung US-i parnok nem teyari agüja nungiter.
Jazrat al-Boushams yimtsüng ya Deir Ezzor province nung lir aser iba tesem ya jihadist temi amokbanga lir.
Brihostibarnüa Syria kübok Hama province nung sorkari agia aliba yimtsüng ana nung IS-i nisung 50 dak tema tepset.
Iba tatalokba sülen, US Defence Secretary Jim Mattis-i “President Donald Trump-i Pentagon dang Syria nung IS pur samatsütsü tetuyuba agütsüogo” ta metetdaktsü.