US Tir Trump-i mezüngbuba ‘Foreign Tour’ senzür

Riyadh, Saudi Arabia nung Saudi Arabia Chuba Salman bin Abdulaziz Al Saud-i U.S. Tir Donald Trump aser pa kinungtsü Melania Trump na den ajurutepdang agiba noksa angur.

Saudi Arabia den $110 billion shi alang tenangzüktep agi 

Riyadh, May 20 (Agencies): Honibar anepdang US Tir Donald Trump-i Saudi Arabia semdangtsü atema Riyadh atong aser iba mapang White House-i Saudi den $110 billion shi alang military tenangzüktep agitsü ta osang metetdaktsü.
Trump-i US Tir mapa inyakba sülen tang mezüng atema bendanglima sema senzür aser anogo tinü linük balala sema senzütsü tenzükdang, Saudi Arabia den USD 110 billion alang US defence equipment & services tenangzüktep agitsü ta osang metetdaktsü.
Tanep Riyadh nung aliba King Khalid International Airport nung Air Force One anenzükdang Saudi King Salman-i Trump aser kinungtsü Melania Trump na pela agizük.
Tayimtsü anendak nungi Trump aser pa meinertem ajak royal court-i anir ao aser idakji US Tir nem Collar of Abdulaziz Al Saud tetushi agütsü. Iba ya Saudi Arabia nung civilian sempet tematiba lir.
Arm tsütsü tenangzüktep agiba dak alia US company General Electric-ia sen $15 billion alang tenangzüktep aser memorandums of understanding agitepogo ta metetdaktsü.
“Iran-i amokmerenba mapang ka nung Saudi Arabia aser Gulf region nung security akangshitsü atema defence equipment & services maparenji inyaker” ta tanü White House ketdangser kati ashi.
Tanü Trump-i Salman den senden amen aser pai asüng Muslim linüktem nungi lennirtem den o jembitsü.
Trump jakdang inyaker Barack Obama-i Shiite nunger teimba aliba Iran ang sapur ta
Sunni Arab Gulf state temi temulung melemi bilemba agi, parnok US den tesentaktep mejungi aküm saka tang Trump-i Saudi Arabia semdangba ajanga tesentaktep akangshitsü ta imlar.