Naga yimtenren telok balala nungi nisung 56 GPRN nung aden

Dimapur, May 20 (TYO): Naga yimtenren telok balala nungi nisung 56-i Naga nunger tarutsü teimla aliba telok, NSCN/GPRN nung adentsü lemtetogo, ta GPRN Ministry of Information & Publicity-i tanü sangdong ka nung metetdaktsü.
2015 August 3 nü agiba tezüngzüktep, Framework Agreement sülen temelenshi balala nung ajemdaker parnoki tasuita aser shisa kaa telemtetba tajung agibaji Steering Committee Executives, Cabinet Kilonsers, Deputy Kilonsers aser Heads of Departments densema aliba NSCN/GPRN Joint Council-i pelaa agizüker, ta sangdong nung shia lir.
Tang GPRN nung adener tasenpurtemi NSCN/GPRN lenisüba nung tamang katetba lemsatepba den külemi tatembang telemtetba tajung ka dangi arutsü atema longjemer inyaktsü ta shiogo, ta sangdong nungsa shia lir.
GPRN/NSCN (Unification) nungi arur züngsemtemi NSCN/GPRN tatong Tir, Gen. (retd.) Kholi Konyak, Ato Kilonser Th. Muivah, Kilo Kilonser Rh. Raising, Tatar tem, Heads of Departments aser tongti lenirtem dang, NSCN/GPRN lenirtemji chichiba lenirtem lir, shirnoki ken o telemtetba tajung ka bener arutsütsü ta tamang akar, ta ashi.
Züngsemtemisa Unification telok nung inyakbaji tejang matangtsü ta rajemogo, kechiyong terenlokba mali aser lenirtem dak mangdang aser yimtenren onük mali, ta parnokisa shiogo, ta kasa sangdong ajanga ashi.
Tasenpurtemisa NSCN/GPRN lenirtemi parnok NSCN/GPRN nung agizükba atema pelaba lemsatep.
NSCN/GPRN lenirtem tenüng nung tasenpur agizükdang NSCN/GPRN Kilo Kilonser, Rh. Raising-i parnok dang pelaba lemsatepba den külemi Naga nunger atema pei tajungtiba agi tenzüktsü ayongzük.
Paisa, linük dang nungi kecha meimlai pei akokba tajungtiba agi linük tenzüktsü ajungshia liasü.