India-China tesendaktep ajanga tensa süngjemogo: Rajnath

Gangtok, May 20 (Agencies): Honibarnü India-China arrtsü nung terenlok mapa indang review senden dak sendakba nung Union Home Minister, Rajnath Singh-i, kidanger linük ana tesendaktep junga lir, koba ajanga linük ana tsüngda mepetmesü ajema kümogo, ta metetdaktsü.
“India-China arrtsü onük nung linük ana tangatetba balala lir,” ta paisa ashi.
“Tanü senden amendang India-China arrtsü nung terenlok mapatem asadangogo. Home Ministry-i lenmang 27 yangludar aser item mapaji 2019-20 küm tashi nungbo tembanga inyaktsü. Iba dak alia ano gari lenmang 48 yanglutsü atema maparen tenzükogo,” ta paisa ashi.
Home Minister-i ashiba agi, arrtsülen aliba nüburtemji asalentong atema kanga tongtibang, anungji item tesem nung parnoki nüngdakba terenlok mapatem inyaktsüla.
“Külen asen security sepaitemi arrtsü kümzüka ayur aser külen arrtsülen aliba nüburtemi asenok asalentong atema tongtibang,” ta Rajnath-isa ashi.
Tanü Gangtok nung linük ana arrtsü dak sendakba nung arrtsü konghsia aliba state pongu nungi chief minister tem den senden amenba sülen pai, “Arrtsülen aliba nüburtem nem anema-alibaren, shisaliok, electricity, tzü aser lenmang ama terenlok mapa inyaktsütsüla. Ni state sorkartem dang iba atemaji inyaktsü metetdaktsüogo,” ta ashi.
Iba senden nung Jammu & Kashmir, Himachal Pradesh, Uttarakhand, Sikkim aser Arunachal Pradesh chief minister tem den Rajnath-i arrtsü dak sendakba onüktem asadanga liasü.
Senden nungsa Home Ministry-i inyakba terenlok mapatem, Border Area Development Programme aser state tem o Indo-Tibetian Border Police tsngda amalitepa inyakba onüktem nunga o lemtepa liasü.
Asüng Rajnath-i Sashastra Seema Bal (SSB) Battalion Headquarters-a semdangtsü aser tayimtsü nung mener Uttarey, Kumukh aser Bajrajadhara nung aliba SSB border post tem repranga senzütsü.
Home Minister-isa Sainik Sammelan nung sepaitem ajurutsü aser Sikkim, Pelling nung sentong ka nung jembitsü.