DMB, AKM aser Kma & Dmr Ao kaketshir-i seminar katsü

Dimapur, May 21 (TYO): Divine Bridge Ministries Delhi (DBM), Ao Kaketshir Telongjem (AKM) aser Kohima o Dimapur Ao student telongjem longjemer lanurtem, tongtibangsa Class 12 pass sür alirtem asoshi “Building on Excellence” omen nung ajemdaker Career Guidance Seminar tesem asem- Mokokchung (May 17 nü), Kohima (May 19) aser Dimapur (May 20) nung kanga takok ngua katsüogo.
Iba seminar nung tongti o jembirtemji- Dr. Jamedi, Assistant professor, Dimapur Govt. College, Kr. Aotula T. Imchen, IPS, Er. Yanger Pongen, Er. Asangba Pongen, Dr S.K Chauhan, Director Alpine Institute of Management & Technology, Dehradun aser Supongchiten, Director, Divine Bridge Ministries, Delhi nunger liasü.
Tsüraburtem aser lanurtem Class 10 aser 12 pass sür koleni aotsü? ta shisabulua aliba mapang ka nung DBM aser AKM-i anir iba sentong tajung ayongba ajanga tsüraburtem aser kaketshirtem aika tajangzük nguogo.
Tongtibangsa sentong nung shisalen sayur balalai onük balala nung ajemdaker tajungshiba aser tetuyuba lenmang tajung aika agüja liasü.
Er. Yanger Pongen aser Er. Asangba Pongen nati lanurtem Engineering aser Technical course balala züngnertem asoshi lenmang balala nung tetuyuba agütsü.
Iba dak alia ano Dr. Jamedi Lkr aser Kr. Aotula T Imchen, IPS nati lanur ka taküm nung alizüng shidak yuteta tang nungi terenemshiba tulu nung nükjidong tongtetta azüngtsü ajungshia liasü.
Kasa sendong nungsa Dr. SK Chauhan-i tanü Agriculture, Forestry aser Biotechnology azüngba ajanga tajangzük balala indang lemsatepba liasü.
Paisa, par college ajanga asen Naga nunger kaketshirtem asoshi lenmang balala nung teyari agütsütsü aser direct admission agütsütsü shisem.
Ano Divine Bridge Ministries, Delhi Director, Supongchiten leniba kübok EduAide Career & Counseling Service lir, aser iba ya ajanga asen Aortem dang masü saka Naga nunger aser North East lanurtem jenti admission nung teyari agütsüba den kulemi Delhi aser North India tesem balala nung lanurtem timtem aser lendong mapang ajak nung yaria arudar, aser Tsüngremer tenzükba wadang balala inyaka arudar.
Kasa seminar nung jembidang Mr. Supongchiten-i ashiba agi, küm shia asen Naga nunger tangeri ashioktsüba, tongtibangsa institution balala aser agent balalai osang tai agüja tsüraburtem aser lanurtem takum, rongsen aika nung aoksadakja tai lenmangtem nung aniba indang shisema liasü.
Anungji koba course südir süaka tejangja HRD aser UGC recognized aser approved süa aliba college aser university tem nung azüngtsü paisa ajungshi.
Iba den külemi lanur kati koba lenmang shimdir shimaka tanger jilu ajizüka masü saka pei jangraba, pei dak aketba sempet aser pei akoktsüba lemangtem shima meranga azüngtsü paisa tayongzükba agütsü.
Iba seminar nung lanur aser tsüraburtem noklang ana daka tema arua aden aser tejangertem asoshi course balala nung direct admission agija liasü.