Kohima nung AHoDs aser HoDs senden menogo

Kohima, May 21 (TYO): May 20, 2017 nü Secretariat Conference Hall, Kohima nung Nagaland Chief Secretary, Pankaj Kumar, IAS lenisüba kübok Administrative Heads of Departments (AHoDs) aser Heads of Departments (HoDs) senden menogo.
Aadhar data dak sendakba nung Chief Secretary-i, nisung shia indang Aadhar osang kümzüka ayutsü atema department websites nung osang upload asüdang sorkar department temi kanga kümdanga inyaktsüla, ta ashi.
Chief Secretary-isa Aadhar osang dak sendakba nung tienyaktsü aser meinyaktsü indang telatetbatem metetdaktsüba den külemi UIDAI-i lateta aliba ama inyaktsü ajungshi.
Paisa, Aadhar number aser iba indang osang kümzüka ayutsü atema mapang shia audit agitsüla, ta shisem.
“Land & Assets Management-encroachment & related issues” indang metetdaktsüdang Kohima Deputy Commissioner, Rajesh Soundararajan-i sorkar ali dak sendakba nung onük balala indang metetdaktsü.
Pai ashiba agi, ken o menoa magütsüba mesüra ken o magütsüba ama kuli balala ajanga sorkar meyong ali atsünga agir; sorkar ketdangsertemi nijatem den miima inyakba, kiojen osang aser kuli kakettem tejangja maliba ama kulitem ajanga sorkar ali kümzüka ayuba nung timtem adoker.
Paisa, sorkar meyong kiojen nung arrtsü aser atsü junga mali, ta ashiba den külemi sorkar li atsünga kiojen yangluba bendoktsütsü atema ita ana-asem mapang agia inyakba inyakyim metetdaktsü.
DC-isa, department balala ket nung ali aser kiojen indang osang alitsüla aser maneni item osangji reprangshitsüla, iba den külemi department temi kümshia ali aser kiojen osang renemtsüla aser arrtsü yanglua atsüa atsütsüla, ta ashi.
NSMDC Managing Director, T. Longri Ao-ia Nagaland State Mineral Development Corporation Ltd.-i parnok indang industrial unit asem- Decorative & Dimensional Stone Plant (DDSP) Chümukedima, DDSP Wazeho aser Mineral Industry Growth Centre (MIGC), Kiruphema nungi adokdaktsüba (products) osang agütsü.
Item units nungi adokdaktsba osettemji tangalen nungi bener aruba den tamajungba masü aser jenjanga dalang, ta shia T. Longri Ao-i, sorkar department balalai sorkar indang projects mesüra kiojen balala yangludang item units nungi adokdaktsüba osettem amshitsü ajungshitsüla, ta ashi.
Senden tenzüka Anti-Terrorism Day tenangzükba agia liasü. Iba anogomung ya May 21 nü amunger, ajisüaka iba anogo ya Deobar anogo aser state sorkar office sodi anogo ka asübayong May 20 nü mungogo.