Islamic State-i Palmyra nung archaeologist ka tekong atang

Beirut, August 19 (Agencies) : Palmyra nung Islamic State teloki arishi küm 82 tain retired chief archaeologist ka tekong tangzükogo ta Syria nung antiquities ketdangseri metetdaktsü.

Taküm May ita Islamic State-i sorkar ket nungi UNESCO World Heritage site Palmyra makdok.

Syrian antiquities ketdangser Maamoun Abdulkarim-i retired chief archaeologist Khaled al-Assaad dang Palmyra toktsür aotsü ashi, saka pai ibaji magizük.

“Ni Palmyra nungi aser parnoki ni tepsetyonga ni iba tesem toktsür maotsü” ta Assaad-i Abdulkarim dang langzü.

Mongulbar anüngdang Homs province nung ISIS-i Assaad tekong tanzüka yok. Parnoki Syria nunger antiquities expert tongtipang rongnung ka tepsetogo, ta Abdulkarim-i metetdaktsü.

IS pusemertemi Palmyra nung Assaad indang mang süng ka nung alenloker aliba noksa ka internet nung sayuogo.

Taküm May ita Palmyra makdokba sülen nungi IS kiralongrartemi nisung noklang aika tepsetogo.

“Küm 50 tashi Assaad-i Palmyra nung antiquities ketdangsüa aru aser pa mapa nungi anisüngzüker joko küm 13 buba liasü” ta Abdulkarim-isa osangbenertem dang ashi.

Assaad indang mang anasa tezüluba ka yuja aliba nung IS-i pa tamanger ka masü aser Syria sorkar pusemer ka ta aija lir.

Pai Syria tenüng nung bendanglen mamangertem den shilem külemi agi aser pa Palmyra’er süngyanglutem asoshi director liasü, ta IS-isa tezüluba nung aija lir.

Britain nung amenoker inyakba Syrian Observatory for Human Rights-ia Assaad tepsetba osang metetdaktsü.

Parnoki ashiba agi Assaad ji Palmyra nung public square ka nung nisung aika adenshia lia tepset.