Mongsenyimti Kaketshir Telongjem-i küm 75 Jubilee nüngtem nüngshi mapa inyaktsü

Mokokchung, May 21 (TYO): Mongsenyimti Kaketshir Telongjem (MKT) tenteter aruba taküm December nung küm 75 ajungba Jubilee mung amungtsü nükla yur inyaka arudar aser MKT-i Jubilee nüngtem nung akhidang tsürabur arem nung alidang Tsüngrem külemba tesem nung anisüngzük semtu ka yanglutsüba May 20, 2017 nü semzükogo.
Iba semtu lapoktsüba mapang Mongsenyimti Baptist Arogo sannüker, Imti Ozüküm-i jembidang Mongsenyimti nung tensa onsara tamajung kati menepa yimeri meinyakba tai tongloktsür India sepaitemi 1956 April 30 nü yim mitsü küma rongdoktsür yimer ajak talidak makai tejenokdak bushia arem nung oa ali, ta ashi. Paisa yimertem ajak arem nung alidang telok ka Azüklen (tsüngrem apudong) aser telok ka Kalilulen (Jangnarolu) ta alidang parnok pei alidak tesem nung Tsüngrem külemdak mesemteta külema aruba rongnung Jangnarolu nung aliba Tsüngrem külemdak tesem Kaketshirtemi bilemteta mapa tajung inyaktsüba atema tenüngsanga ashi.
Mongsenyimti nunger arem nung alitsü aitdang tamanger noklang shilem nung shilem 5 shi dang liasü saka ita trok arem nung lir yimtsüngi tanaben meyipa adokdangbo tamanger shilem 95 kümer liasü, ta paisa ashi.
Kasa sentong nungsa MKT Advisor, Imotong-ia tatsüka jembidang, Kaketshirtemi Jubilee nüngtem akhidang tsürabur tamangba mongchen mesemteta toktsüba ajanga kaketshirtemi Tsüngrem dak maneni metaloker aotsü jenjangdong yanglushiba ka südaktsütsü nükla nung inyakba lir ta ashi.
MKT Tir, Putiwapong-i ketdangsüa aniba sentong nungsa Mongsenyimti Compound Baptist Arogo sannüker Imtimenpang-i sentong meshiteta sarasademtsü.