NDA sorkari Kashmir onük tatem küma latettsü: Rajnath

Pelling (Sikkim), May 21 (Agencies): Jammu & Kashmir nung tang tashi tensa mesüngjemteti aliba mapang ka nung tanü Union Home Minister, Rajnath Singh-i, NDA sorkari teti atema Kashmir onük latettsü, ta metetdaktsü.
Tanü Sikkim anüolen aliba Pelling jila nung lokti senden ka nung jembidang Singh-i, Kashmir nung timtem agütsüba ajanga Pakistan-i India linük tashi meitdaktsütsü meranger, ta aitsü.
“Ajisüaka ozü sorkari teti atema Kashmir onük latettsü,” ta paisa ashi.
Taküm April 9 nü Srinagar Lok Sabha menden atema by election agiba anogo nungi tenzüka tanü tashi Kashmir tensa mesüngjemteter. Election anogo nungji security sepaitemi injang yokdang nisung ti khaseta liasü.
Yaküma sepaitemi Hizbul Mujahideen telungpur commander, Burhan Wani khasetba sülen iba anema longkak aitdang nisung 80 shi süogo.
Tanü Rajnath-i, “Kashmir ji asen meyong, Kashmir nungerjia asen meyong. Onoki Kashmir onük tatem küma latettsü,” ta ashi.
Modi sorkari Pakistan densema kidanger linük ajak den tesendaktep tajung ayutsü atema inyaker, ajisüaka Pakistan-ibo par tangatetba memelenshir, aser parnoki India tashimeiti kümdaktsüner, ta Home minister-isa ashi.
“Pakistan-i parnok tangatetba melenshitsü ta onoki amanger. Parnoki memelenshira onoki melenshitsütsüla. Alima ya ka ama dang akümba sülenbo linük kati ka tashi meitdaktsütsü makoker, kechiyong alima linüktemi ibaji mamadoktsü,” ta paisa shisem.
Home minister-i anogo asemnü atema Sikkim semdanga lir, aser iba mapang nung pai India-China arrtsü kongshia aliba state pongu nungi Chief Minister tem den senden mena security tensa den arrtsülen terenlok mapatema asadanga jembiogo.