Imphal nung Japan-i WWII sepaitem tushir

Imphal, May 21 (Agencies): India nung Japanese Ambassador, Kenji Hiramatsu-i anir Japan nunger telok kati Honibarnü Imphal anasa aliba Maibam Lotpa Ching, India Peace Memorial semdangogo.
Japan nunger telokji ‘Battle of Imphal, World War II’ küm 73 ajungba bilemtetbamung nung adentsü atema aruba lir.
Japanese Ambassador den Japan nunger teshimtet nübo 30 den Nagaland parliamentary secretary, C Apok Jamir aser Burma Campaign Society chairperson, Akiko Macdonald nungertem aru.
‘Battle of Imphal, World War II’ anogomungji Manipur Tourism Forum aser 2nd WW Imphal Campaign Foundation nati state Tourism department den yaritepa ayongzüker.
Ambassador Kenji Hiramatsu-i ashiba agi, Bishenpur district nung aliba Maibam Lokpa Ching nung Japan-i war museum ka yanglutsü.
World War II mapang Maibam Lokpa Ching nung British aser Japanese sepaitem rara aser March nungi June 1944 tsüngda Imphal aser Kohima nung Japan nunger sepai 70,000 shi taküm sama.
“Japan nunger sepaitem Imphal aser Kohima nung arua rara aser parnok aika kidangi meyipa moutet. Iba dak sendakba nung sorkari Japan den takok lenmang ajak nung yariteptsü” ta Manipur Chief Minister N. Biren Singh-i ashi.
Japanese ambassador Hiramatsu-isa Imphal aser Nagaland nung Japan nunger sepaitem temang bushitettsü atema nübortemi yaritepang ta mepishia metetdaktsü.
Taküm November ita Japan nung azüngtsü jangrar India kaketshirtem atema shisatokden ka alitsü aser Japan sorkari Manipur o Nagaland nungi nisung metsür pungugu Japan semdangtsü atema jaoker, ta Hiramatsu-isa shisem.