Mkg nunga Intl. candlelight memorial service amung

May 21, 2017 nü Mokokchung nung Candlelight Memorial Service agiba sentong nung ARTC Medical Officer, Dr. Temsumenla Lkr (abelen) aser NMP+ Tir Temsuwabang (ajichi noksa) nati jembidang tangokba noksa nung angur. 

Mokokchung, May 22 (TYO): May 21, 2017 nü alima ajunga nung “Ending AIDS Together” omen nung ajemdaker 34buba International Candlelight Memorial Service ayongzüka amungba den külemi Mokokchung jila nunga Life Founding Centre Alempang Baptist Arogo den külem sür NMP+, DAPCU aser ARTC Mokokchung-i Alempang Baptist Arogo nung sentong tajung ka ayongzüka HIV/AIDS tashidak agi asürtem bilemteta mungogo.
ARTC Medical Officer, Dr. Temsümenla Longkümer-i alima ajunga nung iba anogo amungba indang ashidang, 1983 küm ibai San Francisco (US) nung mezüng tenzüka mungyonga aruba otsü ashi.
Iba anogo amungba ya tongtibangsa HIV/AIDS agi asürtem bilemtetba den külemi akümlirtem nem iba indang tali rajema kümdaktsüba mapang ka lir, ta lai ashi.
Iba ama sentong balala agiaka aser angashiaka, asenoki koma inyaker? ta asübaji tongtibangba lir, ta laisa ashi. “Tanübo iba tashidak den raratsü asoshi mozümora tabensa adoka lir, anungji ajak longjemer asen lokti nungi iba tashidak samatsütsü asoshi merangdi,” ta laisa ayongzük.
Alempang Baptist Arogo Pastor Rev. Temsü S-ia mapang tatsüka agidang, iba wadang ya nisung ka kisüngi makoktsü, anungji longjemer iba tashidak anema raratsü asoshi tayongzükba agütsü. Iba tashidak agi atongertemi meshitetba timtem aika ajurua alitsü, ajisüaka Tsüngrem dak dang teimla ayutsü asoshi paisa ayongzüka liasü.
Sentong nung NMP+ ketdangsür Temsüwabang-i jembidang, küm nung tashidak tapu balala asoshi anogo ka agiteta mungtsür, ajisüaka HIV/AIDS tashidak atemabo anogo ana shiteta amunger, ta ashi. Iba ama sentong aiben liaka kümshi teimba-teimba dang züiner, anungji, “asenoki ibai züzüa masü saka süoki ia agitsüla,” ta paisa ashi.
Iba tashidak agi tonger alirtemia ochishia temai adoktsüla, yamaji iba tashidak aketertemji lokti nung mesendoki parnok dang aochitsüla aser temeim mapa benshia maongka agütsütsüla, ta paisa mepishia ashi. “Iba tashidak aketertemi iba tashidak nem mekokdaktsütsüla aser iba tashidak agi metongi alirtemia ibai kanga junga angatettsü nüngdaker,” ta paisa shisem.
Sentong nung telok kari ken ajanga Tsüngrem osang aben aser sentong nung adener ajaki asürtem bilemteta candle tsükloka akhüm agüja liasü.