Sukhoi-30 tayimtsü ka China arrtsü anasa sama

New Delhi, May 23 (Agencies): Sukhoi Su-30 jet ka nung Air Force pilot ana mener tanep Assam Tezpur anasa China arrtsülen yimzüba mapang sama ta Air Force-i osang metetdaktsü.
Parnoki ashiba agi, iba tayimtsü tanep 9:30 ako meta apuso aser China arrtsülen Arunachal kübok Doulasang tesem nung sama.
Pilot tem den tatembangsa osang agitepbaji 11:30 ako meta liasü aser iba mapang tayimtsüji north Tezpur nungi kilometre 60 shi pilar liasü.
Tezpur Air Force station ya China arrtsü nungi kilometre 172 pilar lir.
Sonitpur district Deputy Commissioner Manoj Kumar Deka-i ashiba agi, iba tayimtsü bushi tenzükogo.
Sukhoi Su-30 ya Russia nungeri yangluba tayimtsü lir. Iba tayimtsü ya tsüngsang ajak nung anishitettsüba, air-to-air aser air-to-surface mission atema twin-engine inoka yangluba tayimtsü ka lir. Su-30 tayimtsü ya IAF puri 1990s tatemlen nungi amshi tenzük.
Iba tayimtsü amshi tenzükba nungi tang tashi nung 6 bo tsükokogo. Tayimtsü tsükokba dak sendakba nung bushisüngdang nung technical failure ajanga tayimtsü tsükoker ta bushiteta lir.
Taküm March ita Rajasthan, Barmer air base anasa Sukhoi-30 tayimtsü ka tsükok, saka pilote anaprongla iba lendong nung tasütsü nungi jenbua liasü.