Ni Africa atema tongti süa inyaker: Modi

Ahmedabad, May 23 (Agencies): Mongulbarnü Prime Minister Narendra Modi-i India aser South Africa tsüngda tesentaktep tajungba akümba atema tenüngsang agütsü aser paisa ashiba agi 2014 nungi pa prime minister inyakba sülen Africa atema kanga tongti süa bilema inyaker.
Gandhinagar nung African Development Bank (AfDB) indang 52 buba senden nung o jembidang Modi-i “linük ana tsüngda tesentaktep tajungba küma arudar aser India-i maneni Africa den agriculture, infrastructure, power aser industry tsütsü yariteptsü” ta metetdaktsü.
“Tesüiba küm 15 tsüngda India aser Africa tsüngda shishilembaba jenjang kanga junga kümogo. Tesüiba küm 5 tsüngda Africa den $72 billion tashi shishilembatepogo. Tesüiba küm asem tsüngda India minister temi Africa nung linük ajak semdangogo. Ni 2014 nung prime minister inyaktsü tenzükba nungi, ni Africa ji India’er foreign & economic policy atema tongtiba kümdaktsü” ta Modi-isa shisem.
India aser Africa linüktem nung tayongzükba balala ajuruba indang jembidang, India-i aluyimertem, sensaktia, yimtsüngtem renloktsü aser infrastructure wadangtem nung maneni yaritsü, ta Prime Minister-isa ashi.
Tesüiba küm asem tsüngda India nung pai aniba sorkari inyaktetbatem indang ashidang, “sorkari 2022 tashi nung aluyimertemi züsentetba anasü agi teimba kümdaktsütsü atema mapatong ka tenzükogo aser yimtsüng ajak nung electricity agütsütsü atema mapa inyaker” ta Modi-isa metetdaktsü.
“Sangküm tashi nung India nung yimtsüng ajak nung electricity alitsü. Clean Ganga, Renewable Energy, Digital India, Smart Cities, Housing for All aser Skill India mission tem ajanga India tasen ka akümtsü aser azükaru aser terenlok aliba linük ka akümtsü” ta paisa shisem.