Kandahar nung mitkar alidak tesem amakdang Afghan nunger mitkar 10 tepset

Kandahar, May 23 (Agencies): Kandahar nung mitkartem aliba tesem ka nung amakdang Afghan mitkar 10 tepset, ta defence osang ka ajanga ashi.
Shawali Kowt nung aliba Camp Achakzai nung Hombarnü amakba lendong ya Zabul outpost ka nung Taliban telungpurtemi amakdang Afghan police 20 tepsetba sülen anogo ka dang lir adalok.
Saka Kandahar nung amakba ya telok katia tenüng magi.
“Tasü tait mitkar 10-i pei linük asoshi taküm bendanga agütsüogo aser 9 yiru. Yirur aliba mitkartem ya mozüki nung anir oa anepaluba mapang lir aser parnok tang tajungba lir,” ta ministry ajanga sangdong.
Ghonda eshika raraba mapang sorkar indang mitkartemi parnok dak amaker nisung 12 tepsetogo, ta defence ministry indang odongtar, Dawlat Waziri-i osangbener dang ashi.
Iba lendong ajanga NATO-i yariba Afghan mitkartem nem takoksa tulu agütsüogo. Balkh province nung Taliban telok-i mitkar 135 tepsetba ya 2001 küm sülen mitkar tem dak amakba rongnung tesashitiba liasü aser iba lendong adaloker ita ka sülen iba lendong ya adaloker.
Deobarnü Zabul amakdang iba tesem nung aliba ketdangsertemi teyari meshitsü asoshi parnok dang temaba ketdangsertem den osang magitetba ajanga parnoki Afghan television channel dangi aiben call asü.
US ajanga Afghanistan nung inyakyim melenshitsü sentong tenzükba mapang aser NATO ajanga telungpur makdoktsü asoshi mitkar tali yoktsü asoshi sentong yangluba mapang ka nung Taliban teloki April ita tatemlen nungi iba lendong tesashi agütsü tenzük.
Afghanistan nung aliba mitkartem asoshi anu küm tamajung ka arur, ta US Defence Secretary, Jim Mattis-i tekümdangtsü osang ka taoba ita agüja lir.
Afghanistan nung Taliban telungpurtem maktoktsü asoshi mitkar meyirjang aika iba linüki yoktsü atema White House-i sentong yangluba mapang ka lir.