Homs aser Damascus nung suicide car bomb apok

Damascus, May 23 (Agencies): Syria nung aliba Homs yimti nung Mongulbarnü car bomb ka apokba ajanga nisung pezü pokset aser 16 yiru, ta ketdangser ajanga ashi aser Damascus nunga bomb ka apok, ta kasa osang ajanga ashi.
Homs nung aliba al-Zahra tesem nung Mongulbar anepdang bomb ya apok, ta UK nung aliba Syrian Observatory for Human Rights ajanga ashi.
Syria nung aliba state-news agency, SANA ajanga osang akütsüba agi, iba lendong nung asür nisung pezü aser yirur 30 liasü, ta ashi.
Sorkar anemer telok Waer tesem nungi ainshitsü asoshi tezüngzüktep agiba sülen Homs yimti ya Syria sorkar kübok lir, ta sorkari Deobarnü sangdonga liasü.
Syrian Observatory for Human Right ajanga ashiba agi, Damascus nung aliba Sayyida Zeinab tekülem ki anasa car bomb ka Mongulbarnü apok, saka nisung kata masü.
Pei sasa temang nung bomb inoker pokdaktsür nisung ana bena aliba gari ka Damascus International Airport anasa al-Mustaqbal tesem nung police temi poksatsü, ta SANA ajanga ashi.
Iba gari apokdang gari nung mena alir nisung anaprong ya asü aser civilian ka asü aser ka yiru, ta SANA ajangasa ashi.
Syria nung rara adoker küm 7buba ajungdang nisung 465,000 rara mapang tepsetogo aser nisung million ka dak tali yiruogo. Iba linük nung rara metenzükdang aliba nüburtem rongnungi tesadang ka pei ki doktsür ainshiogo.