Arunachal nung Naga nungertemi “Autonomous Council” meshir

Itanagar, May 23 : Arunachal Pradesh state nung district asem Tirap, Changlang aser Longding (TCL) nung alir nübortem ya Naga nunger lir aser parnoki centre government dang autonomous council agütsütsüla ta takangba ka agüja lir.
Arunachal Pradesh nung alir Naga nungertemi parnok alidak renloka onür saka state government-i Naga nungertem merenlokdaktsüi soita ayur ta parnokisa aitsü. Naga nungertemi parnok lushi nung terenlok mapa inyakba mapang ka arutsü asoshi mapang talangka ataogo, tangbo joko autonomous council aküm nung dang Naga nunger lushi nung terenlok mapa inyaka otettsü ta parnokisa metetdaktsü.?
“Central government-i Naga nunger timtem aser taginüba reprangdangtsü atema yakta committee ka shimtsüla aser Naga nunger nem autonomous jenjang agütsütsüla,” ta TCL lushi nung alir Naga nungertemisa metetdaktsü.
Tang tashi nung TCL kübok aliba tesem aser nübortem tia ya temeimtsüka lir, anungji ato kilonser, Narendra Modii shisatsü ajanga nübortem mulung yirua alirtem aneptsütsü imlar ta parnokisa metetdaktsü.
TCL nung alir Naga nungertemi parnok alidak renloknüba agi autonomous council jenjang meshir saka iba temeten aser taginüba indang Pema Khandu-i aniba government mapang kenyongi tejembia mejembi senzüka toktsü ta TCL nung alir Naga nungertemi ashi.
TCL purtem lushi nung mozü ki, kaketshisatsü angazükdak kaketreju aser lenmang kecha meyanglutsüi nübortem aika timtemdaktsüba va kechi tebilemba (?) ta TCL nübortemisa takangba agütsüogo.
“Kodang kasa adianusa ser nung Nagaland-bo state angu, onokbo timtemseta lia aotsüba tia ka nung toktsü,” ta parnokisa ashi. ” Government-i onok timtemba tia mereprangi toktsüba asoshi jashia bilemer,” ta TLC lushi nung alir Naga nungertemisa metetdaktsü. Arunachal Pradesh nung alir Naga nungertem asoshi autonomous Council jenjang meshitsü atema kaketshirtema telok ka tentetogo.