Minister Yitachu den RMSA aser SCERT ketdangsertemi Meluri nung rejutem semdang

Kohima, May 23 (TYO): Nagaland Minister for School Education & SCERT, Yitachu den RMSA aser SCERT ketdangsertemi Mongulbarnü Phek district kübok Meluri sub-division nung aliba sorkar shisaliok rejutem yangluba reprangdanga ao.
Joint Mission Director tem- Kevi Rio aser Visiezolie Yashii na den Minister Yitachu-i Government Higher Secondary School tasen yangluba aser Government High School, Meluri nung Class IX & X takdang tasen yangluba reprangdang.
Parnoki contractor tem den ajurutepa sensaksemdang, taküm February ita tensa mejungi akümba ajanga mapa meinyakteti liasü ta contractor temi ashi.
Yitachu-i mapa inyakbatem reprangdangba sülen temulung asüba metetdaktsü aser tekaratiba nung mapa inyaktsü atema contractor tem ajungshi.
Department-i Primary nungi Higher Secondary school tem ajak GIS Mapping indang mapa inyaker aser ibaji taruba ita ana tsüngda renemtsü imlar. Iba sülen school aser tesayurtem asadanga mapa lemsatsütsü, ta Yitachu-i tanü ashi.
Kevi Rio-ia mapa inyakba nung tenük asünger aser 2018 academic session nungibo ki tasenba nung agitsü imlar ta ashi.
Paisa ashiba agi, GHSS Meluri ki tasenji Union Ministry of Human Resources Development ajanga aser GHS nung Class IX & X takdangji Ministry of DoNER ajanga teyari agütsür.
Union Ministry of DoNER-isa GHSS Meluri aser Medziphema nung Computer lab yanglutsü atema teyari agütsütsü, ta paisa shisem.